Kawthaung In Thailand Ram A Lutmi Myanmar Rammi 24 Tlaih An Tong
===================
Myanmar ram, Kawthaung ramri in Thailand ram ah tilawng in a kalmi Myanmar rammi 24 kan tlaih hna, tiah Thailand ralkap nih cathanh an chuah. May 9 zanlei sang ah Myanmar rammi 14 cu an tlaih hna i, Thailand luhnak ding ah minung pakhat nih Thailand Baht 30,000 an liam. Annih hi Thailand ram Phuket le Malaysia ah rianṭuan dingin a kalmi an si.
Tilawng khaltu pa cu a zam manh, tiah theih a si. Cu bantuk ṭhiam in May 7 lio zong ah Thailand ram Yanaung pengkomh, Kawthaung in Thailand ram ah a lutmi Myanmar rammi 10 cu Thailand nawlngeitu nih an tlaih hna, tiah theih a si. Tlaih a tongmi Myanmar rammi 24 cu palik sakhan ah kan chiah hna i upadi ning in bia an ceihpiak hna lai, tiah Thailand ralkap nih cun an langhter.
Paletwa Peng Cu Pengkomh Pakhat In Kan Ser Cang — IKACC; Chin ramkulh, Paletwa peng cu mah tein aa ukmi pengkomh pakhat in kan ser i, pengkomh ukhruainak phu cu Paletwa ukhruainak pengkomh Council in rian kan ṭuan lai, tiah Interim Khumi Affairs Consultative Council(IKACC) nih nihin May 10 ah cathanh an chuah.
CDF-Paletwa le IKACC nih a luancia March 22 in 24 tiang a voikhatnak Coference meeitng an rak tuahmi ah atu bantukin biachahnak an rak tuah, tiah theih a si.
Cun, dohthlennak caan chung ah Chin ramkulh chung um peng dang hna he pehtlaih rianṭuannak ah fawi zaang deuh ding in pengkhat, pengkomh khat in rian an ṭuan cang lai, tiah an langhter.
Hakha Ah Lai Baibal Thiang Uk 2,000 Leng A Phan Cang; Chin ramkulh, Hakha ah Lai Baibal Thiang cauk uk 2,000 leng cu CACC ah a phan cang, tiah theih a si. Lai Baibal Thiang cauk hi Korea ram ah uk 20,000 kan namter. Cu chungah uk 2084 hi Hakha a phan. Lam le sul harnak ruangah a dang hi a phan kho rih lo. A rauh hlan ah a phan colh ko lai, tiah CACC caantling rianṭuantu pakhat nih The Chin Post ah a chim.
Nihin May 10 zinglei ah thlacamnak le lawmhnak bia kan chim hnu ah Lai Baibal Thiang cauk cu zuar hram kan thawk. Korea ah uk 20,000 kan nam i uk 5,000 hrawng hi ramdang ah a kal ding a si. A taangmi hi ramchung ca ah a si, tiah a chim.
Lai Baibal Thiang cauk hi phun 3 in nam a sinain phun 2 lawng Hakha a phan kho rih, tiah theih a si. Zipper a nganmi hi ukkhat ah Kyats 31,000 le Zipper a hmemi hi ukkhat ah 26,000 in CACC Cauk Dawr ah an zuar, tiah theih a si. Lai Baibal Thiang Cauk cu nihin May 10 zinglei lawng in CACC nih zuar hram an thawk nain nikhat chung lawng ah uk 300-400 kar an zuar manh, tiah theih a si.
Kahdohnak Ruangah Hakha Ah Ralhrial In Aa Dor Mi Minung 2,500 Leng An Phan! Chin ramkulh, kakip ah kahdohnak a zual ruangah ralhrial in minung 2,546 tiang Hakha an phan cang, tiah IDP(Hakha) in ṭuanvo ngeitu nih a chim. A luancia thla 2 lio khan ralhrial mi an karh ngai. A bik in Kalaymyo le Hakha le Gangaw karlak um khuate hi an tam. Hakha le Kalaymyo kar ummi hna zong ral an hrial hna. Chin Christian University (CCU) ah ralhrial chungkhar 34, milu in 111 an um, tiah theih a si.
“IDP camp ah a um lomi Hakha khua chungah a ummi ralhrial chungkhar 673, milu in 2,546 an si. Camp ah a ummi hna zong kan si khawh chung in kan zohkhenh ko hna. Ralhrialmi an karh chinchin kho men,” tiah IDP Hakha ṭuanvo ngeitu pakhat nih a chim.
Hmunkip kakip in CCU camp ah aa dormi hna cu ṭuanvo ngeitu nih anmah le si khawh chung in an bawmh hna. A bik in eidin facang, chiti le cite tibantuk hi an herh bik. CCU camp ah aa dor lo i anmah tein inn hlang in a ummi hna zong anmah le umnak sang le veng Khrihfabu bu nih min cazin an lak hna i, bawmhnak zong an va pek hna, tiah Chin World nih a ṭial. Credite; The Chin Post