SAC Jet Fighter Nih Khuapi Khua Le CDF-Senthang Head Quarter Bomb A Thlak Ṭhan; Hakha-Matupi Lam Hmanrih Lo Dingin Thawngthanh
=========
May 11 zing suimilam 12:5 ah SAC raltuknak vanlawng nih Khuapi khua le CDF-Senthang Head Quarter ah Bomb a thlak ṭhan. Bomb thlak mi chungah inn le lo a rawk mi kong fiangin theih a si rih lo tiah CDF-Senthang nih May 11 ah thanhca an chuah.
Atu lio ah Senthang peng a him rih lo caah Hakha-Matupi motor lam pi cu May 11 thok in hman rih lo ding in mipi sin ralrin pek nak thawng an thanh hi a si. Aluan cia May 8 zanlei suimilam 6 ah SAC raltuknak vanlawng nih CDF-Senthang Head Quarter ah Bomb a thlak caah CDF-Senthang ralkap minung 2 an nunak a liam i, 4 hliam an tuar tiah kan theih.
Khaikam Le Kalay University Pawngkam Um Mipi Hna Nan Inn Cio Ah Kir Khawh A Si Cang Tiah CDM Siyin Nih Thawngthanh; Khaikam khua le Kalay University sianginn SAC ralhrang sakhan pawngkam um in a rak zam mi, mipi hna nih May 11 zing suimilam 10 hnu in nan mah le nan inn cio ah kir khawh a si cang tiah CDF CDM Siyin nih May 11 ah mipi sin thawngthanh nak an tuah than.
CDM Siyin nih May 9 lio ah SAC ralhrang sakhan he meng 1 dan ah a um mi hna nih a hnu bik May 10 ah nan umnak cio, i thialkam dingin CDM Siyin nih May 9 ah mipi sin ah theihternak thawng an rak thanh mi cu a tubantuk in kirnak nawl an pek cang hna hi a si. Thawng kan thanh ning in mipi nih nan kan zulh piak mi cung ah kan i lawm tuk tiah an langhter chih.
Paletwa Peng Cu Pengkomh Pakhat Ah Kan Ser Cang__IKACC; Chinram kulh, Paletwa peng cu mah tein aa ukmi pengkomh pakhat ah ser a si cang i, pengkomh ukhruainak phu cu Paletwa mahte in ukhruainak pengkomh Council (Affairs Consultative Council-PADC) in ṭuan a si lai, tiah Interim Khumi Affairs Consultative Council (IKACC) nih May 10 ah thanhca an chuah.
2023, March 22 in 24 tiang IKACC le CDF-Paletwa nih a voi khatnak i tonnak an tuahmi ah atu bantukin biachahnak an rak tuah hi a si, tiah thanhca an chuahmi ah an langhter. Dothlennak caan chung ah Chin ramkulh chung um peng dang hna he i pehtlaihnak le rianṭuannak ah fawi deuh ding in pengkhat, pengkomh khat in Paletwa peng mipi ukhruainak phu nih ṭuanvo kan laak cang lai, tiah thanhca an chuah.
Pale Peng, Kandaunt Palik Sakhan Luhhnawh In An Kah Caah SAC Ralhrang 10 Leng An Thi; Sagaing ramṭhen, Pale peng, Kandaunt(ကန်ဒေါင့်) khua um palik sakhan ah umhmun a khuarmi SAC ralhrang pawl cu luhhnawh in kahdoh an ton caah SAC 10 naak tlawmlo an thi, tiah M7 People’s Defense Army in ṭuanvo ngeitu pakhat nih a chim.
May 10, zan suimilam 8:45 tluk in zan suimilam 12:00 tluk tiang Pale peng, Monywa- Pale- Gangaw lampi um SAC ralhrang thazaang 70 hrawng nih umhmun an khuarnak palik sakhan cu mipi hriamtlai phu fonh nih an luhhnawh hna caah kaphnih kar kahdohnak a chuak. Cu kahdohnak ah SAC ralhrang lei 10 naak tlawmlo an thi pin ah tamngai nih hliamhma an tuar, tiah theih a si.
“Battalion hna, LPDF hriamtlai in minung tamngai nih luhhnawh in an kah hna, an sakhan cu kan la kho lo, an sakhan in pe’ 80 tluk tiang kan neih khawh. SAC ralhrang nih 60MM hriamngan hna in an kah bawmh hna nain rawlbawmtu cu an ra lo” tiah M7 People’s Defense Army in ṭuanvo ngeitu pakhat nih Khit Thit ah a chim.
Kahdohnak cu Thunder Guerrilla Force Battalion 202, M7 PEOPLE’S DEFENSE FORCE le tualchung hriamtlai ṭangṭi phufonh hna kan si i, mipi hriamtlai in minung 6 nih hliamhma an tuar. Cu chung ah pakhat hi a nunnak caah thinphang ngai a si, tiah an langhter chih. Credite; Lungmili Post