Myitkyina Khuapi Ah SAC Ralkap Nih KIO Hruaitu Pahnih An Tlaih Hna!
============
Kachin ramkulh, Myitgyina khuapi chung um Shwe Lake Pya Hotel ah KIO hruaitu pahnih cu SAC ralkap nih an tlaih hna, tiah KIA naihniam sin in theih a si. June 5 zaantim ah KIO hruaitu pahnih riahnak Hotel cu SAC ralkap nih an theih caah an kal hnawh hna i an tlaih hna, tiah KIA he naihniam in a ummi pakhat nih Kachin News Group(KNG) ah a chim. Shan ramkulh, Kokang hmunram ah Myanmar National Democratic Alliance Army(MNDAA) le SAC ralkap kar kahdohnak a chuak i, SAC ralkap 20 leng an thih pinah hriamnam le zen-kuan zeimawzat zong MNDAA lei nih an laak, tiah The Kokang nih an thanh.
June 1 ah Kokang hmunram chung ah rallam a sialmi SAC ralkap 70 leng cu MNDAA Brigade 511 nih June 4 le 5 ah an kah hna. June 4 zinglei kahdohnak ah SAC ralkap motor 1 a rawh leng ah ralkap 4 an thi. Cun, zanlei suimilam 1:00 ah kahdohnak a chuak ṭhan i, SAC ralkap 8 an thi ṭhan. june 5 ah MNDAA le SAC ralkap pawl cu an i kap ṭhan i ralkap 16 an thih pinah tam ngai hliamhma an pu. MNDAA lei zong in hliamhma pumi an um ve, tiah theih a si. MNDAA nih SAC ralkap seh meithal kuan 230, hriamngan kuan lung 3, bomb lung 1 telh in hriamnam le zen-kuan zeimawzat an laak, tiah Khit Thit Media nih a ṭial.
Hlasakthiam Lily Naing Kyaw a thattu tiah ruahmi Kaung Zar Ni Hein kum 23 le Kyaw Thurah kum 30 hna cu kan tlaih cang hna, tiah SAC ralkap nih an thanh. Kaung Zar Ni Hein le Kyaw Thurah cu Special Task Force chungtel an si i, KNU Tatmaha-1 ah bomh lei a cawngmi an si, tiah SAC ralkap lei nih an chim. Hlaphuah thiam Aung Naing San telh in minung 4 zong social media ah SAC dohnak catial ruangah an tlaih hna, tiah theih a si.
Hlaphuah thiam Aung Naing San cu May 30 zaanlei ah Khit Thit Media nih an langhter mi SAC ralkap dirkamhtu Lily Naing Kyaw thah a tonnak kong he pehtlai in comment a ṭialmi kongah an tlaih, tiah theih a si. Yangon khuasa minung 4 hna zong rampi daihnak hrawktu ca, Social Media ah an tial tiin SAC nih an tlaih hna, tiah The Irrawaddy nih a ṭial.
Sagaing ramṭhen, Butalin peng hrambunh Zarmani PDF sakhan cu SAC ralkap nih nizan June 4 zanlei suimilam 3:00 hrawng ah an luhhnawh i, an khangh pinah PDF pathum nunnak a liam, tiah PDF in ṭuanvo ngeitu pakhat nih a chim. SAC ralkap nih an thahmi PDF ralkap pathum cu Naing Oo(kum 29), Kyaw Zin Myo(kum 19) le Hmaing Gyi(kum 34) hna an si i, SAC ralkap 120 leng nih sakhan an luhhnawh lio ah an tlaih hna i an thah hna, tiah Zarmani hruaitu nih cun a chim.
“Kan sakhan chung kan um lio ah ruah lo piin SAC ralkap nih hriamngan in an kan kah i kan sakhan cu an rak luhhnawh. Kah manhnak caan kan ngeih lo caah kan zaam dih. PDF pathum hi meithal kuan nih a khen hna caah an zaam kho ti lo,” tiah a chim chap. Nunnak a liammi PDF pathum hna hi hriamnam serchuah lei ah kan bochan tuk mi hna an si. Meithal kan i kenmi dah ti lo cu sakhan chung a ummi thilri, zen-kuan le bomb zong zeihmanh kan la manh lo. An zate kyats sing 1,000 man hrawng a si lai, tiah Zarmani PDF hruaitu pa nih cun a chim. SAC ralkap nih PDF sakhan an khangh hnu nihin June 5 zinglei tiang ah SAC ralkap pawl cu sakhan pawngkam ah an um rih lai tiin an zumh caah nunnak a liammi PDF pathum ruak zong an lo kho rih lo, tiah theih a si.