Kyaukhtu Peng, Yinye Khua Cu SAC Ralkap Nih An Khangh I Inn 27 A Ciam
=============
Magway ramṭhen, Saw peng, Kyaukhtu khua pawng a ummi Yinye khua cu SAC ralkap nih, May 31 zanlei suimilam 4:00 hrawng ah an khangh i, inn 27 a ciamh pinah khuami pakhat nunnak a liam, tiah tualchung mi hna sinin theih a si.
Yinye khua cu Kyaukhtu he meng 5 hrawng aa hlatnak ah a ummi a si i, khuahlun le khuathar fonh ah inn 150 hrawng a umnak khuate a si. SAC ralkap nih an khanghmi hi khuahlun a si. SAC ralkap nih khua an khangh lio May 31 zanlei suimilam 2:30 hrawng ah Kyaukhtu hrambunh miakpi ralkap le PDF hna cu kaphnih in hriamngan in an i kap, tiah theih theih a si.
Cu hnu ah Kyaukhtu vanlawng tual in SAC ralkap 17 cu motor in Yinye khua ah an kal i, khuami hna innlo cu an khangh, khuami pa pakhat a zengmi zong mei nih a kangh chih, tiah min langhter a duh lomi khuami pakhat nih a chim.
SAC ralkap pawl cu khua in an chuah hnu ah Yinye khuami le pawngkam khuami hna nih mei cu an phalh caah a khua ning pi in a ciamh lonak a si, tiah a chim chap. Data For Myanmar nih, May 19 i an langhter ning ah SAC ralkap le an kuttang mi nih inn an khanghmi hi 2023 February 28 tiangah Magway ramṭhen chung lawng ah inn 9,019 a phan cang, tiah an langhter.
NLD Cozah Deputy Minister of Planning and Finance, Set Aung Cu Thonginn In A Chuak; Nawlngeihnak latu SAC nih rampi biathli thuhnak phungphai he pehtlai in kum 3 chung thong an thlakmi NLD cozah Deputy Minister of Planning and Finance, Set Aung cu Yamethin thonginn in nihin June 2 ah a chuak cang, tiah theih a si.
Deputy Minister Set Aung cu zawnruahnak in an chuahmi si loin a chuah caan a tlin cang caah an chuah, tiah theih a si. SAC nih nawlngeihnak an laak hnu in NLD cozah chawlehnak lei ruahnak petu Sean Turne zong an rak tlaih i, a computer chung ah Myanmar kong chawlehnak tete an hmuh caah SAC nih rampi biathli thuhnak phunghram he pehtlai in taza an rak cuai cang.
Taza cuai a tongmi hna hi Aung San Suh Kyi, NLD cozah Minister of Planning and Finance a rak ṭuanmi Kyaw Win, Soe Win, Deputy Minister Set Aung le Sean Turne hna an si i, kum 3 cio thong thlak dingin bia an rak khiahpiak hna, tiah theih a si.
Thong a tla mi chung ah Aung San Suh Kyi lawng a taang i a dang pali cu thong chung in an chuak cang. Nihin ah a luatmi Deputy Minister Set Aung hi Central Bank Vice Chairman a rak ṭuan balmi a si. Credite;The Chin Post