Uknak Lak Hnu In Ralzam 70 Hrawng Cu Rul Cuk An Tong!
========
Sagaing ramṭhen, Kanbalu peng chung ah SAC ralkap nih uknak an laak hnu in mah inn le lo um ngam lo i a zaam mi ralzaam hna chung in ruk cuk ruang ah harnak a tong mi minung 70 an um cang, tiah theih a si.
Uknak laakka in 2023 April thla chung tiang Kanbalu peng chung ralzaam hna rul cuk a tuarmi hi minung 61 an si i hi chung ah ngakchia pahnih telh in minung paruk an thi cang. Atu May thla chung ah minung panga rul cuk an tongchap, tiah theih a si. Kanbalu peng chung ah hin SAC ralkap Kha-ma-ya 361, 368 nih hmun an khuar i tualchung mi 50,000 leeng ralzaam dirhmun in an um, tiah theih a si.
Monywa Khuapi Ṭamhnak Dawr Pakhat Cu Mifir Nih Luhhnawh In Phaisa Kyats Sing 700 Leng An Fir; Sagaing ramṭhen, Monywa khuapi um Ngwe Zar Hlaing ṭamhnak dawr dawr cu May 22 chun suimilam 12:00 tluk ah mifir nih an luhhnawh i phaisa kyats sing 700 leng le dawr hngaktu ngeihmi sui tampi zong an chuh hna, tiah Sangchung ummi hna nih an chim.
“Nu pakhat cu dawr chung ah a rak lut i cu hnu ah a hawile(pa) a auh hna. Dawr ngeitu cu cawl kho loin meithal in an hmuah hnu ah dawr chung a ummi phaisa vialte le dawr hngaktu hna an sui vialte cu an laak dih,” tiah dawr pawng a ummi pakhat nih a chim.
SAC nih nawlngeihnak an laak hnu in Monywa khupi ah, mifir nih dawr luhhnawh in phaisa le suingun chawva chuhnak atu le atu a cang nain mifir an tlaih khawhmi ngaingai an um lo, tiah tualchung mi hna nih cun an chim.
SAC Nih Nawlngeihnak An Laak Hnu Ah Vanlawng In Voi 1,427 Kahdohnak An Tuah! SAC nih nawlngeihnak an laak hnu in kum 2 chung ah vanlawng in kahdohnak voi 1,427 an tuah i, vanlawng kahdohnak ruang ah rammi 634 an nunnak a liam cang, tiah hlathlainak a tuahtu Ngian Lin Thit phu nih an thanh.
2021 February 1 in 2023 April thla tiang ah SAC ralkap nih vanlawng in voi 1,427 kahdohnak an tuah ruangah dohthlennak ah aa telmi chungtel hna le rammi 634 nunnak a liam cang, tiah an langhter. Chin ramkulh chung ah SAC nih vanlawng in kahdohnak voi 77 an tuah i, tualchung mi 64 nak tlawm lo an nunnak a liam, tiah an langhter ve.
SAC ralkap faak piin a dohtu Karenni ramkulh, Chin ramkulh, Karen ramkulh, Shan ramkulh le Sagaing ramṭhen ah SAC nih Martial Law an thanh i, ralkap thazaang tampi an chap pinah vanlawng hmang in kahdohnak faak ngai in an tuah.
Chin ramkulh chung vanlawng kahdohnak voi 77 leng chung ah hin rammi 64 nak tlawm lo an thih pinah Biakinn le biaknak he aa pehtlaimi inn 147 nak tlawm lo a rawk. 2023 January in April thla tiang kahdohnak chung ah vanlawng kahdohnak hi zatuak 71.42(71.42%) a si i, 2022 kum ah 20.77% le 2021 kum ah 7.79 % an si, tiah Khit Thi Media nih an ṭial. Credite; The Chin Post