Bible Sianginn Kai Aa Timmi Chin Mino 3 SAC Ralhrang Nih An Tlaih Hna I An Hrem Hna
=========
Chin ramkulh, Mindat peng mino pa 3 hna cu Bible sianginn kai dingin an kal lio ah SAC ralhrang nih an tlaih hna i an hrem hna hnu ah minung pakhat lawng an thlah ṭhan, tiah theih a si. A luancia May 23 ah khan Bible sianginn kai dingin motor he an kal lio ah Magway ramṭhen, Chauk (ချောက်) khuapi um SAC Checkgate ah pa mino 3 hna cu SAC ralhrang nih hramhram in an tlaih hna i an hrem hna, tiah mit hmutu hna nih an chimh.
“Mino 3 chung ah 1 cu an thlah ṭhan, an tukvelh hnu ah an thlah ṭhan hi a si. A dang 2 hna cu kan thlah hna lai lo an ti i, an kalpi hna caah nihin tiang an thawngpang kan thei kho ti hna lo” tiah mit hmutu nih May 25 ah a chim.
Sualpuh in tlaihkhih a tongmi mino 3 hna cu Mindat peng tualchungmi hna an si i, SAC ralhrang nih an kalpimi mino 2 hna hi nihin tiang an thawng theihkhawh a si ti lo caah an chungkhar hna nih theih an duhnak kong cu The Mindat Post ah an chim.
Chin Ram Ah Sianginn Kai Ding Mincazin Pek Hmasabik Ni Ah Siangngakchia 6741 An Phan; 2023-2024 cacawn kum ah sianginn kai dingin mincazin pek ding ni cu May 23 in May 31 tiang rikhiah a si i, May ni 23 nikhat chung lawng ah mincazin a pemi siangngakchia 1,343,037 an phan, tiah SAC ralhrang kuttang fim cawnnak zung Department of Education nih cathanh an chuah.
Chin ramkulh, Paletwa cu May ni 24 ah sianginn kai dingmi mincazin peknak thok a si i, sianginn kai dingmi min aa pemi an tam ngai, tiah theih a si. Myanmar ram pumpi huap in tang kua le tang hra kai dingmi mincazin a petu minung 65,855 an si i tang nga in tang riat tiang kaiding mincazin a petu hna cu minung 1,069,847 le tang li in a tanglei minung 1,069,847 an si.
Chin ramkulh, Kaya ramkulh le Sagaing ramṭhen hna hi mincazin a pemi a tlawm biknak hna an si.
Atu hi Chin ramkulh, Matupi peng, Lailenpi khuapi um Private sianginn dah ti lo cu SAC ralhrang sianginn ah mincazin a pemi siangngakchia an um rih lo, tiah min langhter a duh lomi CDM Sianginn cachimtu Saya pakhat nih a chim.
Demoso Nichuah Lei Ni 9 Chung Kahdohnak Ah Captain 1 Telh In SAC Ralhrang 40 Tluk An Thi; KNDF Ralkap In 8 An Nunak Liam; Karenni ramkulh Demoso nichuah lei ah KNDF ralkap tangti phu le SAC ralhrang ni 9 chung kahdohnak ah Captain 1, Lieutenant 2 telh in ralhrang 40 tluk an thi tiah KNDF B-1 nih May 24 ah an langh ter.
“May 14 in 23 tiang ni 10 tluk kahdohnak chung ah SAC ralhrang 40 tluk an thih pin ah an Commander 2 zong hliam an tuar. A thi mi le hliam tuar an tam nain an kuttang ralhrang pawl hna cu hnu ah pil ter duh lo le hramhram in hmailei ah an fon ter chinchin hna caah ralhrang an chungkhar hna zong nih rak thei hna seh” tiah KNDF nih an langh ter chih.
Hi kahdohnak chung ah Loikaw, Ngui-dawng le Hparuso(ဖရူဆို)SAC ralhrang hna nih hriamngan in nichiat te an vun bawmh hna pin ah Jet Fighter zong nih voi 60 nak tlawm lo Bomb a thak. Ni 9 chung kahdohnak ah SAC ralhrang sin in MA-1 zun 8, MA-2 zun 1, MA-3 zun 3, MA-4 zun 1, 9mm Psitol zun 1, RPG zun 2 le hriamthil dang tampi zong an lak piak hna. Mah pin ah SAC ralhrang 2 zong a nung in an tlaih chih hna.
Hi kahdohnak chung ah KNDF B-1 in ralkap 1, KND B-7 in ralkap 2, KNDF B-9 in ralkap 3, KNDF B-10 in ralkap 1 le KA lei in ralkap 1 an dihlak mipi ralkap minung 8 nih ram le miphun caah an nunnak an pek. Hi kahdohnak cu KNDF, KA, KNDF-ETD, KNDF-UAV le Loikaw PDF hna an i bawm.
Demoso nichuah lei kap ah May thla thok in SAC ralhrang he nichiar te kahdohnak tuah peng a si caah mipi nih kahdohnak kan tuahnak hmunhma chungah khualtlawn le um kal lo ding in KNDF nih ralrin an pek hna tiah kan theih. Credite; Lungmili Post