Ti A Lianh Ruangah Gangaw Peng Ralhrial Mi Hna Umnak Inn 20 Le Chi Dum Acre 100 Leng A Rawk! Nihin July 31 ah Magway ramṭhen, Gangaw peng ah ruahpi fak tuk in a sur ruangah Tinle tiva le Laungkat tiva an lian i, ti lian nih cun Htayhlaw khua ralhrial hna i dornak inn 20 a hrawh pinah Chi cinnak hmun acre 100 renglo a hrawh chih, tiah tualchung mi hna nih an chim.
Tuzing deilei suimilam 1:00 in 3:00 tiang fak ngai in ruah a sur ruangah ruahlo piin tiva ti cu an lian, tiah khua mi pakhat nih RFA ah a chim. Ralhrial hna i dornak inn an rawh pin ah facang le lo rian ṭuannak ah an hman mi thilri vialte zong ti nih a fanh dih. Tutan tilianh bantuk hi cuhlan kum 30 chungah kan tong bal lo, a voi khatnak kan ton a si, tiah tualchung mi nih an chim.
Tiva kam ralhrial mi hna i dornak inn 20 ti nih a fanh ruangah milu 100 renglo cu eidin, hnipuan le caan karlak an i dornak ding, a rannak in bawmhchanh kan herh ko, tiah tualchung mi nih RFA ah an chim. Credit: TCP
Relchap: SAC Nih Thla 6 An Sauh Chap, Nihin NSDC Meeting Ah Henry Van Thio Aa Tel July 31, nihin ah SAC nih National Security and Defense Council (NSDC) meeting an tuah i State Emergency caan thla 6 an sauh than tiah theih a si.
SAC nih an thanh ning ah tutan thla 6 an sauh chap mi hi 2008 phunghrampi poh-mah 425 cherhchan in kan sauh ti a si. Nihin NSDC meeting ah caansau ngai a lang ti lo mi Pu Henry Van Thio zong aa tel ve. Credit: TCP
Relchap: Chin Ram, Mindat Peng Kahdohnak Ah SAC Ralkap 8 An Thi Chin ramkulh, Mindat ah nizaan July 30 ah kahdohnak voi hnih a chuak i cu kahdohnak ah cun SAC ralkap 8 an thi, tiah CDF-Mindat nih nizaan July 30 ah an thanh.
July 30, zinglei suimilam 7:25 ah Mindat hrambunh khah lah yiah 274 pawng ummi SAC ralkap hna cu CDF-Mindar nih an va kah hna. Kahdohnak ah SAC ralkap 1 a thi i, CDF-Mindat lei in ralkap 2 hliamhma an tuar.
Cu ni ṭhiamṭhiam zaanlei suimilam 3:40 ah Mindat khuachung sang pakhat ah ral vennak a tuahmi SAC ralkap le palik nih an zulhmi motor pakhat cu CDF-Mindat nih an kah ṭhan hna i SAC ralkap 7 an thi. SAC ralkap a thi mi ruak le hliam pumi hna cu motor in an kalpi hna. SAC ralkap motor le hriamnam cu kan la kho lo, tiah CDF-Mindat nih an thanh. Credit: TCP
Relchap: Karenni ralkap nih SAC 120MM miakpi kuan chiahnak inn an laak Karenni (Kayah) ramkulh kahdohnak chung ah SAC ta a si mi 120MM miakpi kuan chiahnak inn an laaknak video cu Karenni ralkap K-Army BA 5 nih July 30 ah an langhter.
“Laak khawh mi hriamnam vialte lakah man ngei bik le SAC pawl nih an tih bik mi pakhat, zei bantuk tlangcung hriamtlai phu hmanh nih laak bal rih lo mi 120MM kuan an si,” tiah K-Army BA 5 nih an langhter. Khoika SAC camp le zeitik caan ah dah an laak ti mi tu cu an thanh mi ah an langhter lo nain Mese khua kahdohnak lio ah an laak mi a si theo lai tiah tualchung media hna nih an tial. Credit: The Hakha Post
Relchap: Mizoram cozah nih Manipur Ralzaam Caah Nuai 5 Hman Manipur buai ruangah mah nunhimnak kawl in Mizoram ah a lutmi hna caah Mizoram cozah nih nuai 5 a pek tiah theih a si i, Centre cozah sin zong ah tangka a hal ko nain Centre cozah tu nih cun a pe duh lo tiah tualchung media hna sin in kan theih. Manipur in Mizoram ah a rak zaam mi hna herhhai caah Home Department nih an hal bantuk in Finance Department nih nuai 5 a pek cang tiah theih a si.
Manipur buainak a chuah in a ni 14 nak May 16 ah Mizoram Chief Minister Pu Zoramthanga nih Manipur in Mizoram ah a rak zaam mi hna bawmhnak caah Centre cozah sinah nuai 5 a rak hal, ralzaam a lutmi an i chap chin lengmang caah May 23 ah nuai 10 a rak hal. Bawmhchanh ding in Centre cozah cu chimh lengmang a si ko nain nihin ni tiang bawmhnak a pek mi a um rih lo.
Mizoram cozah nih a langhter ning ah Manipur buainak ruangah Mizoram ah a rak zaammi hi July 28 tiang ah 12,611 an um. An lak ah minung 9,382 hi relief camp ah an um i a dang minung 2,799 cu chungkhat sin le le inn hlan in khua an sa. Mizoram ah Manipur Chin ralzaam caah Relief Camp 38 ser a si. Aizawl District ah 13, Kolasib District ah 14, Saitual District 9 a um tiah Vanglaini nih a langhter.
Relchap: Nyaunglebin peng Kahnak Ah SAC Miakpi Battalion Captain Tet Aung Soe A Thi Bago ramthen, Nyaunglebin pengchung kahnak ah SAC miakpi battalion in Captain Tet Aung Soe a thi tiah naihniam chungkhar nih Yangon Khet Thit News ah a chim. July 12 ni Babo ramthen, Nyaunglebin peng kahnak ah Captain Tet Aung Soe cu hliamtuar in a zualhma ngai caah July 29 ah a thi. Captain pa nih nupi fapawi lio mi a tantak tiah theih a si.
“Captain Tet Aung Soe hi cimtlak battalion ah a rak um hmasa hnu in Taungngu battalion ah a rak i `hial. A thi lio ah a nupi cu fa no pawi ka te a si. Hliamtuarnak in a tu siizung ah a thi” tiah naihniam chungkhar nih an chim. Captain Tet Aung Soe cu DSA (51th intake) in a dih mi a si i dohtlennak a tuahmi mipi ralkap cu Facebook in soiselnak kong a tial ton mi a si. Credit: The Chinland Post
Relchap: Yangon ah Police Sakhan Hmu Police Captain Lin Lin Tun, A kuttang nih Meithal in a kah Yangon North Okkalapa Sakhan Hmu Police Captain Lin Lin Tun cu a kuttang Police senngei lo Ar Khar Soe nih meithal in a kah. Siizung ah zualhma ngai in a um hnu, July 27 zan ah a thi tiah theih a si.
July 18 zan 8:30 pm ah North Okkalapa Myomya police sakhan ah Sakhanhmu Police Captain bawi Lin Lin Tun nih a kuttang police pawl cu zan duty dingin nawl a pek hna lio ah Police Ar Kar Soe nih zankhat chungah voi 2 duty tuan a sinak kongah an pahnih karlak bia-elnak a um. Cu hnu ah Police Ar Kar Soe nihcun, police bawi Lin Lin Tun cu M -16 meithal in voi 1 kahnak in Lin Lin Tun cu hliamtuar in a zualhma ngai i North Okkalapa sii zungah an kalpi hmasa.
A hma a zualngai caah Yangon siizung pi ah an thial`han hnu, an thlop kho ti lo caah July 27 zan ah a thi. Meithal a kap tu police Ai Kar Soe cu North Okkalapa Myomya police thonginn ah hrem a si tiah theih a si. Police Captain Lin Lin Tun cu July 29 ni ah a ruak vui a si lai tiah sakhan um police nih Khet Tit media ah a chim. Credit: The Chinland Post
