A Poi ko; Mipi ralkap hruaitu pakhat a nunnak a liam!

SAC Ralkap He I Kahdohnak Ah MSRO Hruaitu Pakhat A Nunnak Liam!
========
Mon ramkulh, Yee khuapi, Yephyutaung khua um palik sakhan pakhat kah dingin an kal hnu an kir lei ah SAC ralkap nih an rak bawh hna i MSRO le SAC ralkap kar kahdohnak a chuak i MSRO hruaitu pakhat a nunnak a liam tiah theih a si.

October 17 ni kahdohnak ah MSRO hruaitu Ko Thi Ha Soe a nunnak a liam mi he pehtlaiin Ko Ma Ka nih “palik sakhan kan va kah i tlamtling tein hnu kan pil, asinain kan pil pah ah ruah loin SAC ralkap nih a kan erhtonh i kaphnih kar kahdohnak a chuak than, cu kahdohnak ahcun kan hruaitu nih a kan liam tak hi a si” tiah a chim tiah theih a si.

“Cycle a ngei mi minung bawmh kan hal hna, a hlan in nan sian lo hmanh ah a cawk in kan in cawk hna lai tiah kan ti leen ko hna nain zeirel loin a kan um caah kan hawipa a nun kan chanh manh lo mi a si” tiah a chim chap. Tutan kahdohnak ah SAC ralkap leiin Bohmu pakhat le ralkap pakhat an i hliam tiah theih a si.

Yinmapyin Peng Ah SAC Ralkap Nih Helicopter In Hriamngan An Thlah Caah Naupawi Lio Nu Pakhat Telhin Minung A Nunnak Liam. Sagaing ramthen, Yinmapyin pengah October 19 zinglei ah SAC ralkap helicopter 6 nih khuate kip ah kahdohnak um loin an duh poah in hriam a thlah caah naupawi nu pakhat telhin nu pahnih an nunnak liam tiah theih a si.

Nu pahnih an thah hna pinah khuachung um mi pa 100 hrawng an tlaih hna i an kalpi hna tiah min langhter duh lomi pakhat nih a chim. Zingka ah an tlaih mi pa cheukhat cu zaanlei ah an thlah than hna tiah theih a si. SAC ralkap helicopter nih a kahnak khua han cu Yinpaungtaing, Pyaoo, Pahtotha, Nuitan, Ngaungtan khua hna an si tiah theih a si.

Kyaukkyi Pengah Rallam Sialmi SAC Ralkap Bomb Puahhnawh An Tong, Minung 4 An Thi. Pegu ramthen, kyaukkyi pnegah rallam sialin a kalmi SAC ralkap hna cu bomb puahhnawh an ton caah minung 4 an thi tiah theih a si.

October 18 zinglei suimilam 6 hrawngah Nyaungpintha khua ah umhmun khuarmi SAC ralkap 100 tluk cu Deikpung tiva kam an phanh ah bomb puahhnawh an ton hi a si i minung 4 an thih hlei ah minung 3 fak ngaiin an i hliam tiah tualchung hriamtlai phu hna an thanh tiah theih a si.

Rallam a sialmi SAC ralkap bomb puahnawh an si ca ah a bawmtu ralkap zong an rat khawh bantukin kaphnih kar kahdohnak a chuah khawh than caah mipi umkal i ralring dingin mipi sinah theihternak zong an tuah tiah theih a si.

Monywa Ah Mino I Sikvuaknak In Meithal Kahnak Tiang A Chuak, Minung 3 An Thi. Sagaing ramthen, Monywa khuapi chung lakphak dawr pakhat ah October 19 ni zaanlei sangha mino pakhat le pakhat biaelnak in i sikvuaknak tiang a chuah lengah meithal kahnak tiang a chuah caah minung 3 an nunnak a liam tiah theih a si.

“Nihin zaaneli suimilam 3 hrawngah a si, lakphak dawr ah cycle pali in minung 6 an rak phan, lakphak an din pah ah anmah le anmah biaelnak a chuak, cu hnuah i sikvuaknak a chuak i mino pakhat pa nih meithal a hun i chuah i a kah hna caah minung 3 an thi, midang cu cycle an i cit i an kal” tiah thil sining cang a hmutu pakhat nih a chim tiah theih a si.

Minung 3 an thihnak ah cun SAC ralkap pawl an rak phan i checkhlatnak an tuah, cun a thimi minung 3 ruak cu an laak i an i kapi tiah theih a si.

Taze Peng Kahdohnak Ah SAC Ralkap 8 An Thi. Sagaing ramṭhen, Taze peng Kankalaykone(ကံကလေးကုန်း) khua ah October 19, chun suimilam 12:00 hrawng ah rallam sialtu SAC ralkap le PDF kar kahdohnak a chuak i SAC ralkap 8 hrawng an thi, hliamhma tuar an tam tiah theih a si.

Cun Taze peng Kanhtomah(ကံထူးမ) palik sakhan kahdoh an ton caah palik 3 an thi tiah Taze PDF nih an chim. Minung thazaang 120 hrawng he rallam sialtu SAC ralkap hna cu Taze PDF Shwebo pengkomh battalion 6 le battalion 7 nih an bawh hna i an kahdoh hna caah, kaphnih kar kahfohnak fak a chuah hi a si tiah hmaikal ralkap hna nih an chim.

Taze peng Kanhtomah(ကံထူးမ) palik sakhan cu Shwebo pengkomh battalion 25 TPC phu nih October 19, chunhnu suimilam 2:00 hrawng ah hriamngan in an kahdoh hna caah sakhan chung ummi palik 3 an thi, sakhan-hmu hliamhma a tuar tiah theih a si.

Yatehtaung Pengah Tang Sarih Kai Lio Mi Ngakchia Nu Pakhat Hriamngan Nih A Hliamhnak In A Nunnak Liam. Rakhine ramkulh, Yatehtaung peng, Pingtaw khua ah tang sarih a kai lio mi ngakchia nu pakhat cu SAC kahmi hriamngan nih a khen caah a nunnak a liam tiah theih a si.

Kum 17 a simi Mah Ngein Ngein San cu October 19 ni ah SAC kahmi hriamngan an inn hmun chungah a tlak caah atu bantukin a nunnak a liam hi a si. Cupinah October 19 ni ah Kyauktaw peng Pingnechaung khua ah SAC kahmi hriamngan a tlak caah minung pahnih hliamhma an tuar tiah theih a si. Credit: The Chin Post