A Poi Ko; Kan Chin ramkulh khuapi thawngpang kan theih mi cu!!

Matupi Ah Zaan Chuahlo Ding Nawl An Chuah, Pumhnak Tuahlio Ah Pastor 2 Le Mino Cheukhat Checkhlat An Tong
=========================
Chin ramkulh Matupi ah penghuap fimcawnnak zung lutlai thah a ton ni thum luan hnu 2022, October 19 ah Saya U Tin Luai te inn pumhnak an tuahlio ah mino paoh an khup an bilter hna hnu ah an tuk hna, cun bia halnak an ngeih hna.

May be an image of road

Pastor 2 zong an hmai ah an bengh hna hnu ah bia an hal hna, cun mino cheukhat cu palik sakhan ah bia halnak le checkhlatnak tuah ding in an kalpi hna tiah theih a si.

May be an image of road

Matupi khuachung Ngala sang le Lawngvan sang ah zaanlei suimilam 6:00 thawk in leng chuahlo ding nawl an chuah, asinain sang dang tu ah cun cubantuk zulhphung/nawl chuahmi cu a um rihlo tiah tualchung mi pakhat nih a chim.
Cun Paletwa gate lei ah cycle he khualtlawng mi 2 tlaih an tong i palik sakhan ah an kalpi hna tiah theih a si. Crd-The Chin Post

May be an image of road

RELCHAP, Bawlakhe Ah SAC Ralkap Sakhan Luhhnawh In Kahdoh An Tong, Ralkap 7 An Thim, Karenni ramkulh, Bawlakhe ah SAC ralkap an umnak gate cu tualchung hriamtlai phufonh nih luhhnawh in an kahdoh hna caah SAC ralkap 7 an thi, hliamhma tuar zong an tam tiah KNDF battalion 10 nih October 20 ah cathanh an chuah tiah theih a si.

October 18, ah Bawlakhe khua luhnak inn dot li cung ah umhmun khuarmi SAC ralkap hna cu, lampi lamkam pawng an umnak gate sakhan le Pon tiva hleidonh ah gate tuah in ummi SAC ralkap hna cu KNDF battalion 10, battalion 21, KA phufonh nih kalhnawh in an kahdoh hna tiah theih a si.

SAC ralkap umnak gate cu luhhnawh in kahdoh an ton caah SAC ralkap 7 an thi, 7 leng nih hliamhma an tuar. Tualchung hriamtlai phufonh lei hliamhma tuarnak umlo in hnu an tolhkho tiah theih a si.

Kayin Ramkulh Ah SAC Kuttang Um Bawi Pakhat A Pistol, Kutcheh Bomb, Motor Pakhat He Tlaih A Tong, Kayin ramkulh, Kyaphyu hmunram ah cycle khalh in phaisa kawlnak tuahtu bantukin ai um ter i a thliin hlathlainak a tuahtu SAC ralkap kuttang um duh-aya-khah-bu-bu(ဒုအရာခံဗိုလ်) Soe Myint cu pistol, kut cheh bomb le motor pakhat he Justice Soldier- PDF phufonh nih an tlaih tiah theih a si.

Lion Battalion Commando Special Force le KTL Army phufonh nih cawlcanghnak an tuahnak hmun chung ah, cycle i khalh in phaisa kawlnak tuahtu bantukin ai um ter i hlathlainak tuahtu ralbawi pakhat cu tualchung hriamtlai phufonh nih a thilri he an tlaih hi a si. Tlaih a tongtu ralbawi pa cu U Soe Myint cu khah-lah-yiah 97 in aya-khan-bu rengin rian a rak ṭuan bal mi a si i a thli in SAC ralkap ca ah rian a tuan tiah theih a si.

Rakhine Le Paletwa Chung Kahdohnak Ruangah Minung 90,000 Leng Ral An Zaam, Rakhine ramkulh le Chin ramkulh thlanglei Paletwa ah SAC ralkap le AA kar kahdohnak a chuah caah mah umnak hmun kaltak in hmundang ah a zaammi 90,000 renglo an phan cang tiah UNOCHA nih October 19 ah an thanh tiah theih a si.

A luancia August thla in October 11 tiang ah ralhrial dirhmun in minung ai chapmi 16,000 leng an si caah cuhlan i ral a rak zaam cangmi hna he an dihlak ah 90,000 leng an phan tiah theih a si. Mah umnak hmun kaltak in ralhrial dirhmun a phanmi hna caah bawmhnak an herh ngai tiah UN OCHA nih cun an langhter.

SAC ralkap lei nih eiding bawmhnak an peklo leng ah, ramdang lei in bawmhnak a lutmi zong an phihkham piak hna a si ah cun ralzaam hna caah harnak tampi an tong kho tiah Kyauktaw peng Ngyaungchaung ralzaam camp ṭuanvo ngeitu U Tan Aye nih a chim.

Nu Pakhat A Tlaihhremtu AA Ralkap 2 Kum 20 Chung Thong Thlak Ding In AA Nih Biakhiahnak A Tuah, Rakhine ramkulh, Butitaung(ဘူးသီးတောင်) peng Kyaungtaung(ကျောင်းတောင်) khua um, kun 30 tluk asimi nutung pakhat cu AA ralkap 2 nih an sualpi caah, kum 20 chung thong thlak leng ah fungtuk sualphawt biakhiahnak tuahpiak an si tiah AA nih October 20 ah cathanh an chuah tiah theih a si.

AA ralkap 2 nih ka umnak inn lila ah hriamnam thazaang i bochan in an ka sualpi tiah, tlaihhrem a tongtu nu nih AA sinah report (phuannak) a tuah caah bia ceihnak tuah in checkhlatnak an tuah hnuah atu bantukin biachahnak an tuah hi a si. Nutung nu a sual pitu AA ralkap 2 zong nih cun zu rit a luan caah kan tlaihhremnak a si tiah chimphuannak an tuah tiah an thanhmi ah cun an langhter.

Cucaah palhnak a tuahtu ralkap 2 hna cu ralkap upadi he aa tlak in 2022, October 20 ah an palhnak he aa tlakmi sualphawtnak cu tlaihhrem a tongtu nu a chungkhar, khuachung hruaitu hna le Biaknak lei hruaitu upa cheukhat hmai ah rianhrang ṭuan le kum 20 chung thongthlak ding biakhiahnak an tuahpiak leng ah, voi 30 fungtuk ding in biakhiahnak tuah piak an si i, fungtuknak cu kan tuahcang tiah an thanhmi ah cun an langhter chihtiah theih a si.

Yinmapin Peng Yinpaungtaing In A Chuakmi SAC Ralkap Kahdohnak An Tong, 9 An Thi, Sagaing ramṭhen, Yinmapin peng Yinpaungtaing khua in a chuakmi SAC ralkap hna cu bomb puahhnawh in doh an ton caah ralkap 9 an thi tiah Yinmapin pengkomh battalion 2 in ṭuanvo ngeitu pakhat nih a chim tiah theih a si.

October 20, zinglei ah Yinpaungtaing khua ah umhmun khuar in rallam sialtu SAC ralkap hna cu khuachung in an chuah lioah tualchung hriamtlai phu hna nih bomb puahhnawh in an doh hna hi a si tiah theih a si. “Yinpaungtaing ah helicopter in minung thazaang an chapmi ralkap hna cu bomb puahhnawh in kahdoh an ton caah ralkap 9 an thi” tiah Yinmapin pengkomh battalion 2 in ṭuanvo ngeitu nih a chim. SAC ralkap hna cu Yinmapin pengkomh battalion 2, Yinmapin peng battalion 1 le Daungmin phufonh nih an kahdoh hna tiah theih a si.

Gangaw Ah Palik Pakhat Nih A Hriamthil He CDM A Tuah, Sing 50 An Pek, Magway ramṭhen, Gangaw peng Gan khua palik sakhan in palik pakhat cu a hriamtling he CDM cawlcanghnak a tuah caah, October 20 ni ah sing 50 laksawng kan pek tiah Gangaw pengkomh battalion 1 nih an thanh tiah theih a si.

Gan khua palik sakhan in palik pakhat nih Gangaw pengkomh battalion 1 sin ah October 16 ni ah CDM a tuah hi a si. CDM a tuah ah G3 meithal pakhat, kuanfang 89, kuanbawm 2 a hun I ken chih caah October 20 ni ah phaisa sing 50 an pek tiah theih a si.

Kalay Airport Remh An Timh Caah November Thla Chung Zarhkhat Ni 3 Ai Din Lai, Sagaing ramṭhen, Kalaymyo Airport remh an timh caah November thla chung cu zarhkhat chung ah ni 3 hrawng vanlawng zuan ai din lai tiah vanlawng tickets zuarbak lei ṭuanvo ngeitu nih an chim tiah theih a si.

Kalaymyo airport remh an timh tuan ah an liim dihlo a si ah cun November thlakhat chung cu zarhkhat ah niruk ni, zarhpi ni, nikhat ni paoh vanlawng zuan ai din lai, tuan ah an dih a si ah cun zarhkhat, zarhhnih chung hrawnglawng i dinh a si lai. Asinain ni dang tu ah cun a mah kel tein a zuangko lai tiah vanlawng tickets zuarnak lei ṭuanvo ngeitu hna nih an chim. Sagaing ramṭhen Kalaymyo peng ah ramkhel lei daihnak a umlo caah mi tampi cu motor in khualtlawng mi an tlawm i, vanlawng hmangmi an tam deuh cang tiah tualchung mi nih an chim tiah theih a si.

Monywa Lamzawhnak Hruaitu Ko Wai Moe Naing Kum 4 Thong An Chap, Monywa lamzawhnak ah hruaitu simi Ko Wai Moe Naing cu SAC ralkap biaceih zung nih October 20 ah kum 4 chung thong thlakchap ding in biakhiahnak an tuahpiak tiah chungkhar he naihniam in a ummi hna nih an chim.

Ko Wai Moe Naing cu poh-mah 505(a) in kum 2 thong, poh-mah 25 caah kum 2 thong tiin kum 4 chung thong tla ding in biakhiahnak an tuahpiak hi a si. Tutam biakhiahnak an tuah piak hlan ah Ko Wai Moe Naing cu kum 10 chung thong tla ding in biakhiahnak an rak tuahpiak cang caah, tutan he cun kum 14 thong tla ding a si cang lai tiah theih a si.

Malaysia Ah Rianṭuan Ding In Aa Thawhmi Myanmar Rammi 30 Tlaih An Tong, Malaysia ram ah rianṭuan ding in a kalmi Myanmar rammi 30 cu lampi ah tlaih an tong, tiah Bangkok Post nih an langhter. Pa 26 le nu 4 cu Ratchaburi pengkomh Mu An khuakomh Fu dum chungah October 18 zan ah tlaih an tong, tiah theih a si.

Kanchanaburi pengkomh in Ratchaburi pengkomh chungah cinthlaknak dum pakhat ah motor in an kal i, Malaysia ramri tan ding in an hngah lio pi ah tlaih an ton hi a si.

Tlaih a tongmi Myanmar rammi hna nih hin minung pakhat nih Agent sinah Thai Batch 3,500 cio an pek. Thailand ram luh khawhnak ca ah Batch 20,000 le Malaysia lanhnak ding ca ah Batch 10,000 an pek ṭhan, tiah theih a si. Phung ning loin a kalmi an si caah Myanmar ram ah an rak kuat ṭhan hna, tiah theih a si.

A luancia October 6 lio zong ah Myanmar rammi 150 cu Malaysia in Myanmar ram ah an rak kuat ṭhan hna. Cu chungah SAC ti lei ralkap ralbawi 6 zong an i tel, tiah theih a si.

Mizoram Palik Nih Bing Rang Rupees Sing 2,800 Leng An Tlaih, India-Myanmar ramri Mizoram ramkulh, Champhai pengkomh palik nih, nikhat chungah Rupees sing 2,800 leng man bing rang cu hmun li ah an tlaih, tiah theih a si.

Nizan October 19 zanlei sml 11:30 hrawngah Champhai pengkomh Tuipui pawngah motor pakhat cu checkhlatnak kan tuah i, Zokhawthar khuami 2 sinin bing rang 5 gram leng kan tlaih, cun zan sml 9:00 hrawng ah Vaphai khuami pa pakhat sinah bing rang 24 gram a ritmi kan tlaih ṭhan, tiah Mizoram palik nih cathanh an chuah.

Cu pinah nizan ṭhiamṭhiam ah Kankawn check gate ah tualchung mi pakhat le Myanmar rammi pakhat sinah bing 24 gram kan tlaih ṭhan. Tarpho khuami pa pakhat sinah bing rang 156 gram a ritmi kan tlaih chap, tiah an langhter. Mizoram palik nih nikhat chungah bing rang 5.688 KL, Rupees sing 2,800 leng man kan tlaih, tiah cathanh an chuah.

Paungde(ပေါင်းတည်) Peng Ah Palik Bomb Puahhnawh An Tong I, Pakhat A Thi, Pahnih Hliamhma An Pu, Pago ramṭhen, Paungde peng Seinpanpin(စိန်ပန်းပင်) khua pawng ah nizan October 19 chun ah SAC motor 3 cu, bomb kan puahhnawh caah palik 1 an thi, 2 hliamhma an pu, tiah Paungde People’s Defense Force(PPDF) nih cathanh an chuah tiah theih a si.

“Cycle in an ra i, khuabawipa zong ai tel. Tangka in lentecelhnak tuahmi hna ngunkhuai khawlh ah an kal, cun PDF he ai pehtlai mi paoh an kawl hna pinah an zumh lomi hna cu tangka an hal hna,” tiah tualchung mi pakhat nih a chim. Cu kahdohnak ah PPDF Battalion 3601, Companny 5 nih kan kahdoh hna. Kanmah lei in a thimi le ai hliammi kan um lo, tiah PPDF nih an langhter.

October Thla Chungah SAC Kuttang Palik 20 Leng CDM An Tuah, October thla thawk in, ni 19 tiang ah SAC kuttang palik 20 leng nih, CDM an tuah cang i mi tam deuh cu mino deuh an si, nifatin ti awk in CDM tuah kan duh tiin an kan chawnh, tiah CDM lei tawlreltu pakhat nih a chim tiah theih a si.

SAC nih palik CDM a tuahtu an tam tuk caah khua chung um palik sakhan cu ṭha tein zohkhenhnak an tuah, tiah CDM palik bawi pakhat nih a chim. “Atu bantukin palik CDM a tuahtu an tam caah sakhan hmu tiang in an rengh hna. An phone zong an chuh hna pinah a caan caan lawng ah leng an chuahter hna. CDM palik pawl cu a himnak hmun ah kan chiah cang hna, tiah a chim chap.

Cun kan hnu nai te ah camipuai phit(distance) dingin a kalmi palik cheuthum cheuhnih zong kir ti loin an tlau beh i pehtlaih khawh an si ti lo, tiah theih a si. SAC nih nawlngeihnak an lak hnu in SAC kuttang palik CDM a tuahtu hi 20,000 hrawng an si cang, tiah theih a si.

Watlet, Thitseihgyi(သစ်ဆိမ့်ကြီး) Khuakomh Cu SAC Ralkap Nih An Khangh Caah Inn 40 Hrawng A Ciam, Sagaing ramṭhen, Watlet peng Thitseihgyi(သစ်ဆိမ့်ကြီး) khuakomh cu SAC ralkap nih an khangh caah inn 40 tluk a ciam, tiah tualchung mi hna sinin theih a si.

A luancia October 16 zanlei sml 3:00 hrawngah Walet peng Thitseihgyi khua ah SAC ralkap an lut i, inn an khangh caah inn 34 a ciam, cun Thitseihgyi khua thlanglei Kugyi khua zong inn 3 an khangh i a ciam dih tiah theih a si. Ngapatchaung(ငါးပတ်ချောင်း) khuami an chawva le thil mansung zong SAC ralkap nih an firpiak dih hna, tiah tualchung mi le PDF sinin theih a si.

Ohphu Palik Sakhan Cu PDF Nih An Kah Caah Palik 5 An Thi, Pago ramṭhen a hnulei Ohphu palik sakhan cu, October 20 zinglei ah PDF nih an kah caah palik 5 an thi, tiah Mae Oh(မြေအောက်) Guerrilla Ohphu in ṭuanvo ngeitu nih a chim tiah theih a si. Ohphu peng, Wai khuakomh palik sakhan cu October 20, zing sml 2:00 hrawngah minutes 17 chung PDF nih an kah hi a si.

“Palik sakhan ah a ummi hi 12 tluk an si. Kaphnih kar kahdohnak a chuak i, palik 5 nak tlawm lo an thi. PDF lei a thimi le aa hliamni kan um lo. An sakhan hauhruang tiang kan naih hna i, kan kah hna. Hriamnam aa thlau tuk caah hnu kan kir than,” tiah Ohphu PDF in ṭuanvo ngeitu pakhat nih a chim. Ohphu hmunram ah PDF le SAC ralkap kahdohnak a chuah lengmang caah tualchung mi a za leng an zam cang, tiah theih a si.

Thla 5 Chungah Myanmar Rammi 50,000 Leng Thailand Ram An Phan , Thailand-Myanmar kaphnih hnatlaknak tuahnak he phung ning tein thla 5 chungah Myanmar rammi 57,000 leng Thailand ram an phan cang, tiah theih a si.

Myanmar rammi 57,000 leng chungah zatuak 80 cu Foreign Job Search Agencies hna nih an thlahmi hna an si. Zatuak 20 hrawng hi Agencies nih thlah mi siloin hmun dang ah rian a ṭuanmi an si, tiah Mesauk hrambunh Jane Addams Children’s Book Awards(JACBA) Chairman Moe Gyu nih a chim. Zatuak 80 tluk hi Agencies hna nih an auh hna i, rianṭha an ṭuan. Zatuak 20 hi thil ṭhit rianṭuan ding an si ko nain rubber dum ah rian an ṭuan, tiah theih a si.

A luancia October 19 ah Ratphone(ရတ်ထဖုန်) pengkomh Sone khala peng chungah Myanmar rammi 50 cu Thailand palik nih an tlaih hna, cun October 18 lio zongah Malaysia kal ai tim mi Myanmar rammi 30 cu Ratchaburi pengkomh ah tlaih an rak tong than.

Hlaing Peng Ah SAC Ralkap Officer Le A Nupi Telh In Minung Pathum An Thah Hna, Yangon ramṭhen, Hlaing peng Thiri Myaing 13 sang ah October 20 zinglei ah SAC ralkap officer nuva le an chungkhar pakhat cu an kah i an thi, tiah tualchung mi hna sinin theih a si.

October 20 zinglei sml 9:30 ah Hlaing peng Thiri Myaing 13 sang um Thiri Myaing motor dirnak(မှတ်တိုင်) pawngah inn a tlung liomi SAC ralkap officer nuva le an chungkhar pakhat an kah hna hi a si, tiah theih a si. “SAC ralkap officer le a nupi nih an bawile nawl an hal hna i, an chungkhar va ton dingah an kal lio Thiri Myaing motor dirnak pawng an phanh ah an nuva le pa pakhat thah an ton hi a si,” tiah tualchung mi pakhat nih a chim.

Zomi PDF Le Ṭangṭi Phu Nih SAC Ralkap 5 Kan Thah Hna Tiah Cathanh An Chuah, Kalay chaklei Kalay-Tamu lampi, meng 55 sakhan in October 17 zinglei sml 6:30 hrawngah SAC ralkap 70 hrawng cu Kalay lei hoih in motor ngan 2 le ke in rallam an sial, tiah Zomi PDF nih cathanh an chuah.

Zing sml 7:30 hrawngah Kanhla khua chaklei hlei pawng in kan bawh hna i, Zomi PDF, Kalay PDF Battalion 8, 12 le 3 hna i bawm in minutes 20 chung hrawng kan kah hna, tiah Zomi PDF nih an langhter. October 17 zing sml 10:00 ah ke in rallam a sialmi SAC ralkap pawl cu Myalay Taung pura pawngah Kalay PDF nih bomb in an puahhnawh ṭhan hna ca ah October 17 kahdohnak chungah SAC ralkap 5 an thi i, 1 hliamhma a pu, cun Zomi PDF ralkap pakhat hliamhma hme a pu ve, tiah an langhter. Crd-The Chin Post