A Poi Ko; Hakha peng le Thantlang peng vialte hi!!

Hakha Peng le Thantlang Peng Thawngpang!!
=================
Chin ramkulh, Thantlang peng ah a luancia zarh ruah a surmi le thli ahrang mi nih facang tam tuk a hrawh hna, tiah theih a si. Thantlang peng mi pakhat nih, “A luancia zarh ah ruah a surmi le thli a hrang mi nih hleh a za cangmi tlanglo facang le nelrawn facang a hrawh dih hna. Thli le ruah nih a choih i a naan hna caah an kiak i an ṭil dih,” tiah The Chin Post ah a chim.

Tukum cu kum dang bantuk a si lo, Rakhine lei in thlichia a hrang mi nih an kan phak ve caah a si kho men. Ruah fak ngai in a sur pinah thli a hrang tuk. Facang hleh a za deng cangmi hna cu an rawk dih ko, tiah a chim chap.
Ral le kokek ral he an kan den tikah zapi zaaran laihlum khuate mi kan caah ahcun mangṭam a tlung ti awk a si ko.

Pipu hna nih mangṭam a tlung an rak ti tawnmi hi, atu kan tonmi harnak bantuk a si ko lai, tiah laihlum pakhat nih The Chin Post ah a chim. A luancia zarh ah fak tuk le pehtlai in ruah a sur caah Hakha khua chung, Falam khua chung le Tedim-Kalay kalnak lam zong an chim, tiah theih a si.

Thantlang peng khuate cheukhat ah kum dang he ikhat loin tlangrai zawtnak faak a tlung tiah theih a si.
“Khuate cheukhat ahcun inn kan lo bak in zawt dih a si, kan zawt tikah Covid-19 zawtnak he zong ai lo mi a lo, a rim theih a si lo, tha zong a kan dih ter ngaingai” tiah khuami pakhat nih The Chin Post ah a chim.

SAC ralkap nih hranhram uknak laak hnu in Thantlang peng ah sii le ai a har caah zawtnak ithlopbul nak kongkau ah harsatnak an tong. “Thantlang peng chung khuate kipah sii khaan kan ngei dih lo, kan ngeih mi cheukhat zongah sii le ai a tlin lo tikah tlangrai zawtnak nih a kan phaak tikah harsatnak a tam ngaingai” tiah a chim chap.

Chin ramkulh, Hakha peng ah caw zawtnak a tlung, an ke a fak i an lei a kak dih, tiah theih a si. Senthang pengmi Caw ngeitu pakhat nih, “Atu lio Hakha peng ah caw zawtnak a karh ngaingai. An ke a fak i an lei zong an kak dih. Cheukhat cu a thimi zong an um. Kawl lei in Laitlang ah an rak kaipi mi hna zong an zaw,” tiah a chim.

Cheukhat khua ah cun kawl lei in an rak kaipi mi caw hna cu khua chung luhter ding a si ahcun caw khat ah 7,000 an lak hna, tiah theih a si. Hakha ummi pakhat nih, “Voidang ahcun caw le naa sahrawm an thahmi hi kan cawk lengmang. Asinain atu lio cu caw tlangrai a tlung an ti thawng kan theih caah sahrawm an thahmi zong kan caw ngam ti lo,” tiah The Chin Post ah a chim.

Cu ṭhiamṭhiam in Hakha khua chungah vok zawtnak a chuak i, tam ngai an thi cang, tiah theih a si.
“Vok pali kan zuat i, an pali ning tein an thi dih. Pahnih cu an ngan ngaingai cang. Vok zawtnak a tlun caah an thi dih,” tiah vok zuatu he naihniam in a ummi pakhat nih a chim.

Chin ramkulh khuapi Hakha ah a min theih rih lomi zawtnak phunkhat in Vok an zaw i a thimi Vok 40 hrawng an si cang i a zawmi zong an tam ngai. Hi Vok zawtnak hi tukum chungah Hakha ah kan tong bal rih lo, atu hi a voikhatnak a si tiah Hakha i saram siibawi pakhat nih The Chin Post ah a chim.

Hi Vok zawtnak hi ṭha tein hlathlai le zohfian khawh a si lo caah i ralrin ngaingai a haumi a si. An zawt ningcang zoh tikah Classical Swin Fever (Hog Cholera) he aa lo pah tiah theih a si. Classical Swin Fever zawtnak cu damhnak sii a um lo i Vok pakhat le pakhat chawnh a fawi tukmi zawtnak a si.

Cucaah Vok a zua/ngeimi na si ahcun zawt khamnak sii chunh cio ding a si. Hi kong he pehtlai in tlamtling deuh in theih a duhmi, Vok zawtnak le zawt kham sii kong ah hal a duhmi kan um ahcun Hakha hrambunh saram zohkhenhnak le thlopbulnak a tuahtu Fidi Veterinary Supplies and Service ah hal le hlathlai khawh a a si! Crd-The Chin Post

Rallam Sialtu SAC Ralkap Dohnak A Tuahtu PDF Chungtel Pakhat A Nunnak Liam. Sagaing ramthgen, Myinmu peng ni chuahkei ah kee in rallam sialtu SAC ralkap minung thazaang 150 leng cu bomb puahhnawh ding in a bawhtu MNRF phu cu kah an ton caah kum 19 simo PDF chungtel tlangval tat-suh-hmu a nunnak a liam tiah theih a si.

A luancia October 24, zinglei ah Moe Nyo Revolution Force (M.N.R.F) phu in tat-suh-hmu le ralkap 4 cu bomb hmanhnak an tuah hnu in SAC ralkap an bawh hna lio ah SAC ralkap nih an kulh hna, cu lioah tat-suh-hmu nih a ralkap PDF ralkap 4 cu a zaam ter hna i an zaamnak lam venpiak dingin kut ser meithal he SAC ralkap dohnak a tuahtu kum 19 tat-suh-hmu cu kah a ton caah a nunnak a liam tiah MNRF phu in tuanvo ngeitu Ko Taezah nih a chim.

A nunnak liammi kum 19 tlangval PDF tat-suh-hmu cu tanghra camipuai ah distintion 2 in teinak a hmutu a si i, October 24 zinglei ah SAC ralkap nih an kah caah a nunnak a liam, October 25 ah a ruak vuinak an tuah tiah theih a si. “Kanmah nih hin hriam tha deuh ngeikho uh sih law, a nunnak hi a liam hngalo, kan ralkap tat-suh-hmu nih kutser meithal he a ralkap vennak tuah in a nunnak a pek” tiah MNRF phu in tuanvo ngeitu Ko Taezah nih a chim.

Madaya Ah SAC Ralkap Bomb Puahhnawh An Tong, 4 An Thi, Mandalay ramthen, Tadaphyu khua hleidonh cung ah checkhlatnak a tuahtu SAC ralkap phu hna cu October 26, zinglei suimilam 7:30 hrawng ah bomb puahhnawh an ton caah SAC ralkap 4 an thi tiah theih a si. SAC ralkap hna cu Naga Ngyinaung tualchung hriamtlai phu, Natsoe phu, MDY PDF((Mongoose Squadron) , Taitthein(တိုက်သိမ်း) phu, NUG: FF phufonh hna nih an kahdoh hna tiah theih a si.

Madaya ni chuahlei ah mipi hna umnak inn cu mei khangh in a hrawktu le tlaihkhihnak tuah in hramhram in tualchung mi a thattu SAC ralkap hna cu Tadaphyu khua hleidonh ah mi chawklet hna cu lam kham in checkhlatnak an tuah lio ah bomh puahhnawh in kan doh hna tiah Naga Ngyinaung phu nih an chim. Bomb puahhnawh an ton caah SAC ralkap hna nih Tadaphyu khua chung ah lut in checkhlatnak an tuah leng ah khuami inn pakhat an khanghpiak tiah theih a si.

Yangon – Mandalay Lampi Ah Motor Accident A Can Caah Minung 3 An Thi, Hliamtuar An Tam, October 26, zinglei suimilam 6:30 hrawng ah Yangon- Mandalay lampi mengtung 228 pawng ah khualtlawng mi motor aa leh caah motor chung cuang khualtlawng mi minung 3 an nunnak a liam, minung 14 nih hliamhma an tuar tiah theih a si.

Cu motor chung ah cun khualtlawng mi minung 17 an cuang i cu chung ah cun pa minung 3 an nunnak a liam. Minung 14 nih hliamhma an tuar, hliamhma tuarmi hna cu pa 10 le nu 4 an si tiah theih a si. Hliamhma tuarmi hna cu mi bawmchantu phu hna motor in Nay Pyi Daw ihkhun 1000 a umnak sizung ah kalpi an si i, an hliamhma kong ah thinphan ding a umlo tiah theih a si.

Indonesia Nichuah Lei Rili Ah Tilawng A Kang, A Nunnak Liammi 17 Tiang An Phan, Indonesia ram nichuah lei rili ah tilawng mei kanghnak a chuakmi ruang ah a thi mi hi minung 17 tiang an phan tiah cozah lei in ṭuanvo ngeitu hna nih October 25 ah an chim tiah theih a si.

KM Express Cantika 77 tilawng cu East Nusa Tenggara ramkulh Timor a lonh ah October 24 ah tilawng cu mei kanghnak a chuak i, tilawng chung cuangmi hna cu lautuk in an um caah tichung ah cun an zuang hna tiah theih a si.

Cu tilawng cu Kupang in Alor, Kalabahi lei an kal ah mei kanghnak a chuah hi a si. Rili chung ah cun mi ruak kawlnak an tuah i, tilawng mei kanghnak a chuah ruang ah a thimi ruak 17 tiang hmuh an si cang tiah mi bawmhchanhnak a tuahtu phu in Putu Sundayana nih a chim.

Rili chung ah tilawng mei kanghnak a chuah ruang ah nun bu in an chanhchuh mi hna hi minung 312 an si tiah theih a si. Tilawng a kanghnak kong ah zei ruang ah a kangh theih fian a si rih lo. A luancia 2018 lio ah Sumatara tiva a thuhbiknak hmun ah tilawng pakhat a rak pil bal i, culio ah cun minung 150 leng an rak thi.

KIA, PDF Le SAC Ralkap Kar Kahdohnak A Chuak, SAC Lei Hriamngan Kahnak Ruang Ah Tualchungmi Nu Pakhat A Nunnak Liam, Kachin ramkulh, Banmaw peng ah SAC ralkap hna nih an thlahmi hriamngan hliamhnak ruang ah tualchung mi nu pakhat a nunnak liam tiah tualchung mi nih an chim.

October 26, chunhnu suimilam 1:00 hrawng ah Banmaw he meng 5 tluk aa hlatnak Mankhun khua pawng ah SAC ralkap le KIA, PDF phufonh kar kahdohnak a chuak tiah theih a si. Kahdohnak ah Banmaw in meng 2 tluk aa hlatnak SAC ralkap sakhan le meng 3 tluk aa hlatnak battalion umnak in hriamngan kah an bawmh hna caah, meng 5 hmun ah ummi Mankhun khuami nu pakhat cu hriamngan hliamhnak in a nunnak a liam tiah khuami pakhat nih a chim.

Monywa-Ayartaw Lampi Ah SAC Ralkap Motor Bomb Puahhnawh An Tong I, Ralkap 3 An Thi, Sagaing ramṭhen, Monywa-Ayartaw motor lampi cungah SAC ralkap phurtu thir in khammi motor pakhat cu, PDF nih nizan October 25 zinglei ah bomb in an puahhnawh caah SAC ralkap 3 an thi, tiah theih a si.

Monywa in a chuakmi SAC ralkap motor cu Black Dragon Special Task Force nih bomb lung 6 in an puahhnawh caah ralkap 3 an thi, hliamhma pumi zong an um. Bomb puahhnawh nak tlamtling tein an lim hnu ah hnu an tolh kho, a thimi le aa hliammi um lo tiah theih a si.

Kum 50 Leng Tak Aa Kholh Ti Lomi Kum 94 Tarpa A Nunnak A Liam, Kum 50 leng tak aa kholh ti lomi vawlei cungah a caak bik le a thurhnawm bikmi kum 94 tarpa cu nizan October 25 ah a nunnak a liam cang, tiah theih a si. Iran rammi Amuharji cu ka tak kai kholh cun ka zaw lai a ti i, tak kholh loin kum 50 leng a um cangmi a si.

Iran thlanglei Phas ramkulh ah khua a sa mi Harji cu khuami nih tak kholh ding in an lem lengmang ko nain a cohlang duh lo. A luancia thla tu ah khan tak kholh ding in an lem lengmang caah a rak cohlan hna. Kum 50 leng tak aa kholh ti lo hnuah a voikhatnak tak aa kholh i, a zawt beh caah a luancia zarh ahkhan Harji cu a nunnak a liam, tiah theih a si.

Kum 2014 lioah Tehran Times nih Harji cu biahalnak an rak tuah i, saram a raangmi sa ka duh tiah a rak leh hna. Harji cu vawlei khur pakhat ah tlakrawh in a rual i cu chungah khua a sami a si. A ruang cu midang nih hnahnawhnak an ka pek sual lai ti a phan caah amah lawng in a um hi a si.

Kum 50 leng tak aa kholh ti lomi Harji cu a takvun ah a chah pipi in an bo i an kak dih cang. A ei dinmi zong a hnawmmi lawngte a si. Khuami hna nih Harji cu tak kholh ding le a thianghlim mi tirawl pek ding in an i timh paoh ah a thin a hung i, a lung a rawk tawn. Cu hnuah khuami nih amah duh ning tein an chiah, tiah theih a si.

Cyclone Thlichia A Hran Ruangah Bangladesh Rammi 16 An Nunnak A Liam, Sing 5 Hrawng An Zam, Bangladesh ram ah Cyclone thlichia a hran caah rammi 16 nak tlawm lo an nunnak a liam i, sing 5 hrawng a himnak hmun ah kan ṭhialkam hna, tiah ṭuanvo ngeitu pakhat nih a chim.

Rili kam ummi pengkomh 15 chungin rammi sing 10 leng cu electric mei a rawh ruangah sianginn an khar, tiah theih a si. Cyclone thlichia a hran lengmang nak a ruang hi khua caan aa thlen ruangah Pacific rili ah atu le atu Cyclone thlichia a hrannak hi a si, tiah Seintist hna nih cun an langhter. “Cyclone thlichia cu nizan October 25 ah Bangladesh ram a phan i, rammi sing 5 hrawng cu a himnak ah kan ṭhialkam cang hna,” tiah an thanh.

Bangladesh ram chaklei Jamuna tiva ah tilawng pakhat a pil i minung 2 an nunnak a liam. Thingkung cungin minung 14 an tla i an nunnak a liam, an dihlak 16 an nunnak a liam, tiah Bangladesh cozah nawlngeitu Jibon Naha nih a chim.

Bangladesh rammi sing 5 hrawng a himnak hmun ah cozah nawlngeitu hna nih ṭhialkamnak an tuah hna nain, Myanmar ram in a zammi Rohingyia 33,000 leng cu an umnak ralzam camp ah an chiah ko hna, tiah theih a si.

Wetlet Ah PDF Ralkap 2 Cu Bomb Nih A Puahhnawh Hna Caah An Nunnak A Liam, Sagaing ramṭhen, Wetlet peng ah PDF ralkap 2 cu bomb an sersiam lioah a puah caah an nunnak a liam, tiah theih a si. October 24 zing sml 11:30 ah rallam a sialmi SAC ralkap va doh ding in an kal lioah bomb ihliam sualnak in BLACK WOLF – ARMY phu in ralkap Saw Kyaw Zaw Shing le ralkap Ṭi Kaung cu an nunnak a liam, tiah theih a si.

Ralkap Ṭi Kaung cu bomb a puah hnu October 24 zing sml 11:30 ah a nunnak a liam i, Saw Kyaw Zaw Shing cu a hliamhma he zan sml 7:00 ah a nunnak a liam ve, tiah BLACK WOLF – ARMY nih an langhter. Crd-The Chin Post