Hpakant Peng Leimin ah Minung 20 Hrawng An Tlau.Kachin ramkulh, Hpakant peng, Ayemyathaya pengkomh, Mana khua lunghring laaknak hmun pakhat cu nihin March 12, zing suimilam 4:00 hrawng ah a min i Company rianṭuan minung 20 hrawng an tlau, tiah mi bawmchantu phu nih an chim.
Mincimhnak a chuahnak hmun cu Oo Cho Company lunghring laaknak hmun a si i, nihin zinglei suimilam 9:00 tiang ah ruak khat lawng hmuh a si, hliamtuar minung 4 cu chanhchuah khawh an si, tiah mi bawmchantu phu in minung pakhat nih a chim.
“Mincimhnak ah cun lunghring latu pawl an i tel pin ah vawlei cotu Company motor (Backhoe) khaltu pawl zong an i tel i an zate minung 20 hrawng an si, atu tiang ah ruak pakhat le hliamtuar minung 4 lawng hmuh an si rih, hliamtuar mi cu siizung ah an kalpi hna, atu ah cun khur thukpi tiang kawl a ngah rih lo caah a pawngkam tete lawng vawlei cawhnak (Backhoe) in kan kawl rih,” tiah mi bawmchantu phu in minung pakhat nih cun a chim.RFA nih an khawmh mi cazin ning ah 2018 in 2023 tiang ah Hpakant peng ah mincimhnak voi 10 hrawng a chuak i a thi mi 600 hrawng an si.
Thawngpang Dang Rak rel Chih :Hpakant Peng Kataing Tlang SAC Ralkap Sakhan Cu KIA Nih A Ningpi In An Laak.Kachin ramkulh, Hpakant peng, Kataing tlang SAC ralkap sakhan cu Kachin ralkap KIA nih nizan March 11 zan ah a ningpi in an laak i Tarmahkan sakhan in a zaam mi Khah-Mah-Yah 119 Battalion Commander, Lieutenant Colonel Thet Paing Tun a thi, tiah KIA thawng laaknak hrampi nih an chim.
Nizan March 11, chunhnu suimilam 1:00 in zanlei suimilam 5 tiang Hpakant peng, Kataing tlang cung SAC ralkap sakhan cu KIA ṭangṭi phu nih luhhnawh in an kah i sakhan a ningpi in an laak khawh, tiah theih a si.
Tarmahkan sakhan in a zaam mi Khah-Mah-Yah 119 Battalion Commander, Lieutenant Colonel Thet Paing Tun telh in SAC ralkap 70 leng Kataing tlang kahdohnak ah an thi, nizan March 11, zanlei suimilam 6:00 hrawng ah KIA hruai mi ṭangṭi phu nih Kataing tlang SAC ralkap sakhan cu a ningpi in an laak, tiah KIA thawng laaknak hrampi nih an chim.
Kataing tlang sakhan cu KIA nih a liamcia 2023 August 7 ni ah an rak laak cang nain SAC ralkap nih vanlawng in kahdohnak an tuah pin ah tanglei in kahdohnak an tuah caah KIA nih an rak chuahtak i, nizan March 11 ah a voi hnihnak an laak khawh ṭhan, tiah KIA thawng laaknak hrampi nih cun an chim.Credit : The Chin Post