A Luancia February Thla Khat Chung Ah SAC Ralkap Kut In Karenni Ramkulh Ah Tualchung Mi 25 Nunnak A Liam.A luancia February thla khat chung ah SAC ralkap kut in Karenni ramkulh chung um tualchung mi 25 nunnak a liam, tiah KNDF nih nizan March 10 ah an thanh.
SAC ralkap nih timh ciammam tein Karenni ramkulh tualchung mi an umnak ah hriamngan an kah ruang le vanlawng in kahdohnak an tuah ruang le hramhram in thahnawnnak an tuah ruang ah sualnak ngei lo tualchung mi 25 nunnak a liam i minung 42 hliamhma an tuar, tiah KNDF nih cun an thanh.
A luancia February 5, zinglei ah Demoso peng, Dawsiei le Loinanhpa khua sianginn pahnih ah SAC ralkap nih vanlawng in bomb an thlak i ngakchia 4 telh in minung 5 an thih pinah minung 35 hrawng hliam an rak tuar, bomb an thlaknak hmun cu ralzaam an i dornak hmun a si i cu ni thawk cun sianginn zong an khar thai, tiah KNDF nih an chim.
A luancia February 5 ni ṭhiamṭhiam ah Shadaw khuapi ah kahdoh bawm ding in a kal mi SAC ralkap nih lam hmuhsaktu ding ah an kalpi mi nu naupawi lio le ngakchia 3 telh in tualchung mi 7 cu lampi ah an rak thah hna. Cu pin ah February 13 ni ah Shan-Karenni ramri Pekhon peng ah SAC ralkap hriamngan kahnak in ngakchia pakhat telh in nu 4 an nunnak a liam, tiah KNDF nih cun an chim.
Progressive Karenni People Force (PKPF) nih an khawmh mi cazin ning ah, SAC ralkap nih hramhram in nawlngeihnak an laak hnu kum 3 chung ah SAC ralkap kut in Karenni ramkulh chung ah tualchung mi 472 nunnak a liam cang.
Up date : Good News : SAC Palik Pakhat Cu Chinland Defense Force – Hakha Sin Ah Hriamnam He Aa Ap.
Chinram, Hakha khuachung ah a um mi SAC palik pakhat cu hramhram in nawlngeihnak a la mi SAC ralkap rianṭuannak a duh lo caah pau dohthlennak ah i tel ve ding in hriamnam i put in Chinland Defense Force – Hakha sin ah aa ap i, CDF-Hakha nih nihin March 10 ah phungning tein an thanh.
Chinland Defense Force – Hakha sin ah hriamnam i put in aa ap mi SAC palik pakhat cu CDF-Hakha nih lunglawm tein an cohlan i tangka Kyats sing 50 an pek leng ah a himnak hmun a phak tiang ṭuanvo an laak kong CDF-Hakha nih an langhter.
SAC ralkap rianṭuannak doh in mipi dohthlennak ah CDM in tel a duh mi paoh cu Chinland Defense Force – Hakha pehtlaih khawh peng kan si i a himnak nan phak tiang ṭuanvo kan in laak hna lai, tiah CDF-Hakha nih an thanh mi ah cun an langhter chih.Credit : The Chin Post