A Poi kho tak tak si ee

Tripura ah Bengali le Mizo organisation fonh Joint Movement Committee nih Bru ralzam hna a bu in Kanchanpur subdivision chungah state cozah nih chiah a timh mi hna duh lonak langhter nak ah zarhte ni ah khan police hna he an buai ruangah police nih meithal an puah ruangah minung pakhat a thi tiah theih asi. Duhlonak langhter tu hna le police karlak buainak ah hin minung 23 nih hliam an tuar i, an lak ah pa sarih hna cu civil mi an si i,police le fire service minung 15 an i tel.

JMC convener Sushanka Bikash Barua nih zarhte ni khan JMC member hna nih hin lungawi lonak langhter in hmunthum, Chamtilla, Pecharthal le panisagar market area ah lam an kham i, lam a khamtu hna hi Tripura State Rifles (TSR) Jawan pakhat nih meithal in a kah hna tiah a chim. Meithal kuan nih a khenmi chungah Srikanta Das (46) cu siizung ah kalpi asi hnu ah a hliam cu tuar kho lo in a thi tiah a chim fawn. BJP thithruai Tripura state cozah nih duhlonak langhter tu hna meithal in kah an si mi kong hi hlathlainak fiangte in tuah dingin nawl a chuah colh i, a thimi chung hna cu cozah nih tangka fang tingnga bulhnak a pek hna lai tiah a chim fawn.

Law minister Ratan Lal Nath nihcun North district magistrate Nageh Kumar B cu magisterial level inquiry tuah dingin theih ter asinak kong le thlakhat chungah report pek dingin theihter asi tiah a chim. Nath nihcun hi thil a cangmi ruangah hin Chief Minister nih deputy minister director general of police le additional director general of police hna meeting a neihpi colh hna a ti.

Mahlio ahcun additional director general of police (ADG) Law and order Rajiv Singh nih duhlonak langhter tu hna nih an kuttuar in police mi le sa zeimawzat nih hliam an tuar tiah a chim i, duhlonak langhter tu hna nihhin security force hna cu an hriamnam hna lakpiak an timh hna i, mah ruangah hin duhthimding an nei lo in a chim. Police hliam tuar mi lak ah cheukhat hna cu Agartala i GBP hospital ah thlopbul dingin an refer hna tiah a chim fawn. JMC nihhin state cozah nih Bru ralzam hna a bu in Kanchanpur subdivision huamchungah umter a timh mi hna cu an duh lo i, a bu in chia lo in hmun dangdang ah phawtzamh dingin an duh. Cozah nawrnak caah hin kan hnu cawn nikhat ni khan rikhiah umlo in duhlonak hi an langhter.