Mipi Ralhrial Hna He I Ton Ding In A Kalmi Ramdang Palai (ASEAN Ambassador) Motor Kahdoh A Tong
=========
Shan ramkulh ah mipi ralhrial hna he i don ding ah a kalmi ramdang nih an thlahmi palai (ASEAN Ambassador) motor cu Hsihseng (ဆီဆိုင်) peng chung ah kahdoh a tong, tiah theih a si. Shan ramkulh, Taunggyi khuapi in Hsihseng peng, Ye-phyu (ရေဖြူ) khua um ralhrial hna va ton ding ah a kalmi Indonesia le Singapore palai (ASEAN Ambassador) hna cu May 7 ah Hsihseng peng, Nan-Oh (နန့်အော) khua in meters 200 hrawng a hlatnak hmun ah kahdohnak an ton hi a si, tiah BBC nih a langhter.
Cu kahdohnak cu caan tlawmpal chung a rau i, hliamhma an tuar hrawlo nain an motor tu cu tlawmpal aa rawk, tiah theih a si. Hi kong he pehtlai in SAC ralhrang le amah lei ṭangmi hna thangthanhnak nih cun tlangcung hriamtlai le mipi hriamtlai phu hna nih an kahdohmi a si, tiah an langhter ve.
Atu bantuk in kahdohnak an tonmi kong ah Indonesia ram nih faakpi in a dohnak kong thawngthanhnak a tuah pin ah Myanmar ram he pehtlai in cabuai cung tonpumhnak hmun ah ceihhmai ding in ASEAN Alternate lutlai, Indonesia President nih a chim.
Kahdohnak an tonnak hmun cu Nan-Oh (နန့်အော) khua in meters 200 hrawng a hlatnak a si i, SAC ralhrang kuttang PNO, Pyitusit le SAC ralhrang hna hmunram zong a si. Mipi hriamtlai phu hna an umnak Karenni (Kaya) ramri in meng 58 tluk a hlatnak hmun a si. Tualchung thawnglatu hna nih “Ramdang palai (ASEAN Ambassador) hna le khua chuahtak in ralhrial mipi hna i tonnak ding cu SAC ralhrang nih duhlonak kong” an langhter.
Thonginn Chungah Tangka I Khon In PDF Sin Ah Sing 5 Bawmhnak An Pek; Myanmar ram khua pakhat thongtla mi hna nih an chungkhar hna sin in tangka an vun kuat tawn mi hna cu i khon cio in Magway ramthen mipi hriamtlai a si mi PRA-Magway sin ah sing 5 bawmhnak an pek tiah PDF upa tuanvo ngeitu pakhat nih a chim.
“Ka khuaruah a har i kam khat lei ah kalung a tha lo, a lawmh zong kan i lawm fawn. An mah sin bawmhnak an kan pek mi nih kan thazaang an kan thawn ter chinchin, hi nak in kan i zuam chinchin lai i kan lungthin zong kan thawn ter chinchin” tiah PRA-Magway Commander Ha July nih a chim.
Myitkyina Peng Ah Pafa Hna Tikhur Chungah Tlaknak In An Nunnak Liam; Kachin ramkulh, Myitkyina peng Lah-myaing khua ah May 9 zinglei ah a fapa cu tikhur chung ah a tla i a pa nih a va chanhnak ah an pahnih in an nunnak a liam tiah mibawmchan tu tuanvo ngei pakhat nih a chim.
” Zing suimilam 11 tluk ah thil a can hi a si, an tlak nak suimilam cheu hnu ah an nau nu pakhat nih zung ah phone an kan chawnh, kan va chanh hna tikah cun an nunnak a liam cang. Tikhur ti a um lo caah an ti kan tuah lai an ti nak a fa cu a tla i a pa nih a va chanh nak ah an pa hnih in an nunnak a liam. An tlak nak tikhur hi pe 40 in 60 kar tluk a thuk mi a si” tiah a cunglei upa nih a chim. A thi mi pafa hna hi a pa kum 40 leng le a fa pa kum 20 tluk an si. An ruak cu chungkhar duh ning tein an inn ah chiah an si. Credite; Lungmili Post