A Linsa Chinchin Cang, Siangpahrang nih Mipi sinah nawlnak a tuah cang mi Malaysia !!

Malaysia Ram Thimnak Ah Party Pakhat Hmanh Nih Teinak An Hmuh Lo Caah Siangpahrang Nih Prime Minister A Thim Lai
===========================
A luancia zarhchung Malaysia ram thimnak ah prime minister hmun hnih thut dingah ai zuammi pahnih cu rikhiah piakmi vote an hmuh lo caah party pahnih ning in hmunkhat ah rianṭuanṭi dingin Malaysia siangpahrang nih a nawl hna nain tlam a tlin lo caah Malaysia prime minister cu siangpahrang nih a thim lai, tiah theih a si.

Malaysia thimnak ah Anwar Ibrahim le prime minister hlun Muyi Dinya Singh hna cu an pahnih ningin cozah ser khawhnak ca ah rikhiah piakmi vote an hmu kho lo, tiah theih a si.

Thimnak ah aa zuammi pahnih cu cozah serṭi khawh nakding ah MP i ruaih cio ding in Malaysia siangpahrang nih caan a pek ko hna nain rikhiahmi caan chungah MP an i ruaih khawh lo caah amah pumpak in Malaysia prime minister cu a thim lai, tiah theih a si.

“Keimah nih Malaysia prime minister cu ka thim cang lai, tiin thawng latu hna sinah Malaysia siangpahrang nih a chim. Malaysia rammi zong nih hi biachahnak ka tuahmi hi nan ka cohlan piaknak lai zong kan nawl hna,” tiah Malaysia siangpahrang nih cun a chim tiah theih a si. Crd-TCP

(Cakilk-Malaysia rampi thimnak an tuah khawh rih hlanlo chung paoh cu thlennak a chuah cuahmah lio a si caah Malysia ram um Myanmar ram mi lei nih Malaysia ram khel kong chim le phuan lo ding le riantuan nak ah siseh, a leng chawkvah ah siseh, Malaysia nawlngeitu nih lam kham in check nak a tuah kho ii tlaihkhih a tam khawh lai caah ralring tein rak um ko uh,)

Kum 50 Minung Nih Mah Holh Holh Khawh Lo Cu Khuaruahhar A Si, Rev. B. Zazawn Lai (GS, LIKBK) Pathian nih kan ram a damternakhnga ding ahcun, kan fellonak le kan sualnak, Pathian duhloning in kan um mi vialte kha kan kaltak a hau.

Laimi hi Pathian nih a kan ser hnawhchannak kan hngal lo, Laimi kan umtu khuasak ning le kan dirhmun zoh tikah Pathian nih a kan ser hnawhchan kan i fiang lo, kan holh kum 50 chungah kan holh kho lo, kum 50 a tling cangmi nih mah holh holh kho lo mi kan um, hruaitu zong, ruah ah lung a fak, hmailei ah Pathian nih sermi kan si bantukin Zungpi nih tuanvo la seh.

Upa zong nih mahholh cu kan cawn awk a si, upa caahcun a si kho lo ti hlah, cawn ahcun thiam a si ko, Ngakchia hna ca an cawn tikah ca an thiam ko, Exam hna an tuah tikah Mizo nih an kan tei tuk, Laimi nih IPS pakhat lawng kan ngeih cu hmanh a pension cang, Pathian thluachuah lo le Pathian nih damter lo mi kan si. Hmailei karhlannak ah Pathian ser bantukin kan um ahcun kan ram hi a damter ko lai.

Thilfir, nuva kong ah maw thilsual kan tuah ah sual ah kan i ruat lo kho men, kan lungthin tlang a sang kho men, asinain cu kan sualnak le palhnak vialte kan lungthin kan thumh ahcun Pathian nih kan ram hi a damter lai i, Pathian thluachuah pekmi miphun kan si ko lai.

Baibal cacang relmi, ka min in kawhmi ka mi hna nih khan an lung an òhumh i thla an cam i ka hmai kha an kawl i an lam òhalo khan an i mer ahcun, van khin ka run theih lai i an sualnak cu ka ngaihthiam hna lai i an ram cu ka damter lai. Crd-The Lairam Times

Laiholh Aa Hrawm Khomi Chin Miphun Nih Kan “Lai Caholh” Kilveng Chinchin Usih, Salai Thomas Lian Thihlum, Chinmi ramkhel lei kan Pa pakhat a simi Pu Thang Ning Kee(CNF) nih a chimmi cu; “Miphun dawtnak taktak timi hi, mah unau dang hna cungah luankai duhnak le cung cuan deuh duhnak kha siloin unau dang hna vialte cungah mah zawn bantuk cio in ruahnak le hmuhnak taktak ngeih khawh hi a si” tiah a rak chim.

A cunglei ah Kan Pa pakhat nih a chimmi biatlang tawite hi a dik tukmi a si. Asinain, zeiruang ah dah Chinmi le Chinmi karlak ah thleidannak meici hi a daih khawh lo. Zeiruang ah dah mah unau cungah mah bantuk cio in zawnruahnak a um hlei lo. Aruang cu mah hi a si; “Tlangholh kan ngeih lo ca ah a si ko” holh hrawm khawhmi kan ngeih lo caah lungkhat taktak a har ti cu nan theih ciomi a si ko lai. Hi kong hi a liam ciami kan Pale tampi nih an buaipi i an tlamtlinh kho hlei lo.

A tu chanthar Chinmi zong nih kan hngalh dihmi buainak a si. Nain cu Zatlang holh(Common holh) cu kan ser kho taktak lai maw? timi biahalnak hi a bia lehnak cu “kan ser kho rih lai lo” ti hi a si. Chanthar mino lungput fimthiamnak le Miphun t’engnge tete i zuamcawhnak a sang tuk cang tikah, chanthar Chinmi pakhat khat holh chung ahcun zatlangholh ca ah kan ser khawh dingmi holh a um rih lo tiah ka hmuh.

Common holh va ser ding a hei si ahcun Halkha holh hi aa tlak bik ko hnga, nain mah kha cohlan zong a si hlei ve lo ca ah Zatlang holh ser khawh a si rih lai lonak hi a si. Aruang cu keimah timi lungput a um cang. Kanmah holh siseh timi lungput kha kan i tlaih dih. Cucu pheh awk um loin kan kalpi ning cio a si ko. Cucaah tlangholh ser le Chinmi lungput hi ai hlat tuk rih caah atu kan lungput hin cun Zatlangholh kan ser kho lai lo.

Chinmi kan lungput cio ah kan i ruah chih tawnmi cu, kan nuhrin holh cio hi Chinmi lakah zatlang holh i a can ahcun kan cung cuang deuh lai tiah kan ruah tawn. Cu nih cun mah nuhrin holh lawng dawtnak a chuahpi i, holh dang in a holhmi Chinmi unau dang hna kha thlanglamh le zomtaih kan hmang tawn. Cucaah cun a tanglei ah ka t’ialmi hi Laiholh aa hrawmmi Chin Miphun hna nih i nunpi hna usih tiah saduhthah a si. Unau dang hna zomhtaih le thlanglamh lungput ngei lo tein kan Laiholh hi t’anh hna usih ti hi ka lung duh bikmi a si. A tanglei Cabia vun rel hna usihlaw…

A cunglei i bialehnak cu mah hi a si; Chinmi vialte nih kan holh hrimhrim in holh hna seh timi lungput hlawt ding. Kan holh hi Chinmi zatlang holh a si tiah hramhram in chim loin, kan unau holh kha upat pek piak ding. Laiholh hmangmi nih Laiholh tein Falam pa kha chawnh ding. Halkha pa nih Mizo pa zong Laiholh in chawnh chih ding. Cu bantuk in Mizo pa le Falam pa zong nih an holh tein Halkha pa kha chawnh ve ding.

Kan unau dang Chinmi holh cu kan theih lo a si ahcun kan i chawnh khawhnak bik aa naih bikmi holh in chawnh hna ding. Zatlang holh cu kan ser khawh rih lo caah, Halkha khualipi Laiholh ai hrawm khomi vialte, Bawm(Bangladesh), Falam peng, Siaha District, Lawngtlai District, Mara, Zotung, Zophei,Thantlang, Zokhua, Senthang, Lautu, Matu,Halkha) hna nih “Laiholh nih a huap khawhmi vial chungte zongah hin biatak chuah in riantuan ding a si. Laiholh a holh duh lomi kha hnahnawhnak va pek lo ding. Kan miphun lungrualnak kha holh in i donhter lo ding.

Chinmi cu holh tampi kan ngeih caah Laiholh nih a huap khawhmi vial chungah hin Laiholh karhchoter i zuam ding. Movie(zukcawl) phunkip Laiholh in leh ding. Lai kokek Movie tampi in chuah i zuam ding. Ramchung ramleng Lai ngakchia nih zoh ding caah Laiholh(Halkha Station Laiholh aw-cawi) tein Cartoon-muit’awn Movie tampi in ser ding. Mirang nih an chuah ciami movie zong Laiholh tein leh thluahmah ding. Chinmi cu Biaknak lei riantuan ahhin kan t’hawng bik caah, Ramchung ramleng Chin Khrihfabu pakhatkhat nih ca le holh Buu nganpi ser in biatak tein t’uan chuah a herh.

Kan holh hi Chinmi vialte nih holh dih hna seh timi lungput tu hi a dik lo. Cucaah kanmah nuhrin holh cio kha kan kenkawi chih i, Holh ngan pakhat Halkha holh aa hrawm khomi Laimi hna nih Laiholh t’hanchonak kong hi biatak tein kan ruah a hau cang. Kanmah Chinmi le Chinmi kan i zomtaih lonak ding ah cun kanmah caholh cio kha kan cawn i kan i hmaizahpiak a hau.

Lai hlaphel chuak tampi in caw usih. Holh dangin sakmi hla nakin Lai hla hi sunhsak thiam usih. Lai Cauk chuak hna bawmhchanh le cawk tlolh hlah usih. Lai bia le hla a caw kho lomi nih kan umnak hmunkip ram le sang le veng ah Laiholh Laica hmang usih. Laiholh in holh usih. Laica in t’ial usih.

Chin miphun lak ah Laiholh a hmangmi le aa hrawm khomi vialte nih, Laiholh uar chinchin usih. Laiholh tlaihchan usih. Laiholh in i chawn usih. Laiholh in i comment usih. Laiholh in capo sai usih. Laiholh in biasawngtlorh usih. Laiholh in Ram kong ceih usih. Kan unau Laiholh a theimi vialte zong Laiholh in chawn hna usih.

2022 hnu in hmailei caan tiang Laiholh kilven thawk chinchin usih. Laiholh in holh uar usih. Laica t’ial cawngin kan innchungkhar hrimhrim ah Laiholh hmang hna usih. Laiholh dawtu Miphun unau lungfim caan a za cang. A tlai rih lo tho cang, thawk cang, holh cang. Pathian pekmi Chin khualipi Laiholh daithlanh ti loin kan tunmer cio hna lai.

Bia kilh: Laiholh a hmangmi Chinmi tampi hna le Laiholh a thlau cuahmah mi hna caah ka t’ialmi a si. Chin miphun holh dihlak upat hmaizahnak ka pek. Nan theih tuk cangmi a si ko nain zei tal ka tuah khawhmi um rih lo. Sihmanhsehlaw phungthluk ah “a hrut nih fimchim” tiah an ti bangin thuk deuh in Laiholh karhzaiternak kan ruahpi cang u ti duhnak a si.Crd-The Lairam Times