Ṭihnungtuk nain zeiah kan rel tawn lomi

Ṭihnungtuk nain zeiah kan rel tawn lomi
===================
Bible a relmi paohpaoh hi kan relmi Bible bia in biaceih an si lai. Bible na rel hnuhnu cun silhnalh khawh asi ti lo. Thangṭhatnak hlasami paohpaoh hi an sakmi hlabia in biaceih an si lai. Hla na sak hnuhnu cun silhnalh khawh asi ti lo. Thawngṭha a chimmi paohpaoh hi an chimmi thawngṭha in biaceih an si lai. Thawngṭha na chim hnuhnu cun silhnalh khawh asi ti lo.

Thlacammi paohpaoh hi an hmanmi bia in biaceih an si lai. Thla na cam hnuhnu cun silhnalh khawh asi ti lo. Pathian bia a ṭialmi le cauk a chuahmi paohpaoh hi an ṭialmi bia in biaceih asi lai. Pathian bia an ṭial hnuhnu cun silhnalh khawh asi ti lo. Jesuh Khrih khamhnak thawngṭha a ngaimi paohpaoh hi an theihmi thawngṭha in biaceih an si lai. Thawngṭha na theih hnuhnu cun silhnalh khawh asi ti lo.

Tamtuk kan theihmi hi a ṭhatuk ko. Tamtuk kan relmi hi a ṭhatuk ko. Tamptuk hla kan sakmi hi a ṭhatuk ko. Tamtuk thla kan cammi hi a ṭhatuk ko. Asinain kan zumh lo, kan zulh lo, kan inunpi lo le nawl kan ngaih lo ahcun kan caah fahnak lawngte an rak si. Na theihmi le na hngalhmi hnihkhatte kha zum law inunpi law ithihpi law Pathian sunparnak caah hmang hna. Tamdeuh na theih ah tamdeuh in hmang ve.

𝐍𝐮𝐥𝐞𝐯𝐚 𝐢𝐝𝐚𝐰𝐭 𝐡𝐢 𝐛𝐢𝐚𝐩𝐢𝐭𝐮𝐤 𝐚𝐬𝐢; Chungkhar hi nuleva pahnih tein aa thokmi asi caah nuleva kut cungah ṭhatnak le chiatnak, thihnak le nunnak thlaici hi aa thokmi asi. Nuleva kan si ruangah fale rosung kan hmuh khawhmi hna an si. Fale hi nulepa theipar an si. Fale cu nulepa thisa in aa semmi an si caah an zeizongte hi nulepa sin in aa lakmi an si.

Kan fale cu mitcaw bantukin an si. An mit an au ko nain hmailei thihnak le nunnak, thilṭha le thilṭhalo kongah khua an hmu kho rih lo. Nulepa nih hruaichom ahaumi an si. An kalnak kip, an tuahmi kip, an duhmi kip ah zohkhenh a herhmi an si. Zohkhenh na daithlan paoh ahcun mitcaw bantukin lamtlang ah a tla lengmang ko lai. Kan fale cu ti thiang bantukin an si. Ti thiang cu zu he na cawhṭi ahcun zurim anam lai. Coffee he na cawh ahcun coffee rim a nam lai. Sugar he na cawh ahcun a tlumpi lai. Ti thurmi he cawhṭi law a thurpi lai. Cawhnuk he na cawhṭi ahcun cawhnuk rim a nam lai. Cubantukin an umnak hmun, an lamhnak hmun, an hawikom hna hi a biapitukmi asi. An hmuhmi le an theihmi kip nih an nunnak a sersiam hna.

Kan fale cu music bantuk an si. Music cu aw phun (7) lawng a um nain zeibantuk aw paoh kha dawhtein anmah le anmah kha sersiam an si. Music tum na thiam deuhdeuh ahcun na tummi aw aa dawh deuhdeuh lai i angaih a nuam deuhdeuh ko lai. Muisc cu a dih kho lomi aw asi. Cubantukin na fale kha cawnpiak zia, chimhhrin zia, lam hruai zia, thazaang pek zia, le lam hmuhsak zia na thiam ahcun hmailei a nunnak ah Bawipa duhningtein a ṭhang cuahmah ko lai. Cu bantuk in nuleva kan isik lengmang ahcun cu nihcun an nunnak asersiam hna. Nuleva mi kong kan ceih lengmang ahcun cu nihcun an nunnak sersiam hna. Nuleva Pathian thangṭhat kan zuam lo ahcun cu nihcun an nunnak a sersiam hna. Nuleva zu kan din, siiṭhalo kan tongh, game kan celh ahcun cu nihcun an nunnak sersiam hna. Nuleva kan idawt lo i, kan upat lo ahcun cunihcun an nunnak a sersiam hna. Nuleva kan iṭhen ahcun hmailei an nunnak le thlarau caah ṭihnungtukmi asi.

Cucaah Bible bia in sersiam an herh. Thlacamnak aw in sersiam an herh. Bawipa thangṭhatnak hla in sersiam an herh. Jesuh Khrih thinlung put dawtnak hi cawnpiak an herh. Na fa ṭha hna seh ti na duh bak ahcun nangmah na nunzia, na thinlung put naa remh hmasa i naa thlen hmasa aherh! Ṭhatein khuaruah ahcun nuleva hi fale ngeih hnucun bia hmanh i el ngam ding asilo. Mithmai hmanh ichiat ngam ding asilo. Nulepa hi an caah lam hruaitu meiceu kan si. Credit: James Van Nei Lian